Դիրքային քաղաքական պատերազմում Փաշինյանը չի հաղթի այս թիմով
Ներքաղաքական իրավիճակը, որում հիմա գտնվում է Հայաստանը, բավական հետաքրքիր է, թեկուզ զուտ ակադեմիական հետազոտության տեսակետից։ Կա իշխանություն, որն ունի լեգիտիմություն հասարակության մոտ, անկախ այն հանգամանքից, որ վերջին արտահերթ ընտրություններն անցան ցածր մասնակցության պայմաններում։ Իշխանությունը, որքան էլ տարօրինակ է, իրենից ներկայացնում է մի քանի բլոկների կոգլոմերատ, որտեղ միավորող իշխանության թիվ մեկ դեմքն է, ավելի շուտ՝ նրան տրված բարձր հանրային վստահությունը, ինչպես նաև՝ շահերի համատեղումը և ոչ ամենևին գաղափարական ընդհանրությունը։ Նույնիսկ դժվար է քաղաքագիտորեն ձևակերպել, թե այս իշխանությունն, ի վերջո, լիբերալ թե նեոլիբերալ հայացքներին պատկանող է, քանի որ այստեղ նույնիսկ ազգային պահպանողականության հետքեր կան, որքան էլ այն համարվի մերժելի զուտ որպես նախկին իշխանության գաղափարախոսությունը լինելու համար։
Այս իրավիճակում հասկանալի է, որ երկարաժամկետ հեռանկարի համար այս իշխանությունը կարելի է ասել կենսունակ չէ, քանի որ նախ առաջին դեմքի հանրային վստահության մակարդակը հավերժ բարձր լինել չի կարող և ապա շահերը ներիշխանական բլոկների կարող են նաև հակադրվել միմյանց, կամ առնվազն չհամատեղվել։ Մյուս կողմից` կա խորհրդարանական ընդդիմություն, որին ընդդիմություն անվանելը լրջագույն մեղքերից մեկը կլիներ, այն էլ Մեծ Պահքի այս շրջանում։
Խորհրդարանական ընդդիմության մի մասը ԲՀԿ-ի դեպքում չափազանց զգուշավոր է իսկ «Լուսավոր Հայաստանի» դեպքում՝ դեռ կարիք ունի ապացուցելու որ ընդդիմություն է հաշվի առնելով որ ընդամենը մեկ-մեկուկես տարի առաջ այն այսօրվա իշխանության, այն ժամանակվա ընդդիմության կազմած դաշինքի մի մասն էր։ Սրան ավելացրած, խորհրդարանական ընդդիմություն իրենց հորջորջողների մեջ կան խորը հակասությունները, որոնք մերթ ընդ մերթ հորդում են փոխադարձ վիրավորանքների, իրար վրա ցեխարձակումների և այլնի տեսքով։ Խորհրդարանից դուրս արդեն արտախորհրդարանական քաղաքական ուժերն են, նախկին իշխանությունները, առհասարակ նախկինների առանցքը, որոնք թեև իրար մեջ գուցե ունեն հակասություններ, սակայն ունեն նաև մեկ հետաքրքիր հատկանիշ՝ շատ արագ համախմբվում են, եթե դրա հարկը լինում է։
Եթե երկարաժամկետ հեռանկարի կտրվածքով նայենք, ապա հենց նրանք են լինելու Փաշինյանի թիվ մեկ հակառակորդները։ Նախկինները դա հասկանում են, լավ են գնահատել իրենց ռեսուրսները կարողությունները և ըստ էության վարում են արնաքամ անող դիրքային տևական պատերազմ։ Այս իրադրության պայմաններում, եթե Փաշինյանն ուզում է երկար մնալ ջրի վրա, ապա պետք է իր թիմը համալրի պրոֆեսիոնալներով, այլապես իր թիմի խոցելիությունը, կիքսերի, թերացումների և այլ բացասական երևույթների առկայությունը, որքան էլ դրանք անձամբ Փաշինյանը փորձի իր վարկանիշով ծածկել, բերում են հենց նրա վարկանիշի անկման, հատկապես, որ նախկինները շատ վարպետորեն են դրանցից օգտվում ու ստեղծում տրամադրություններ հասարակության մեջ։