Մոռացե՞լ եք Լևոն Տեր-Պետրոսյանի վերադարձը
Նիկոլ Փաշինյանի այսօրվա մամուլի ասուլիսից քննարկման արժանի պահերից մեկն էլ նախորդ իշխանությունների վերադարձի մասին արված դիտարկումներն էին:
Բավականին շատ քննարկվեցին նախորդների արածն ու չարածը, լրջագույն բացթողումների, կոռուպցիայի, «ատկատի» և այլ պարսավելի երևույթների մեջ մեղադրվեցին, նաև հիմնովին բացառվեց նրանց վերադարձը իշխանություն:
Հարցին՝ կարո՞ղ են նախորդները ժողովրդին ոտքի հանել և ինչ-որ բան ապացուցել, Փաշինյանը տվեց կարճ պատասխան՝ «Իհա՛րկե չեն կարող, եթե տենց փորձեն հանեն, ինձ թվում ա՝ ժողովուրդը նրանց կհանի որոշ տեղեր»: Ասուլիսի այլ դրվագում, բայց նույն թեմայի մասով Փաշինյանն ասաց՝ «Կասկած չունեմ, որ հին համակարգի բովանդակային մնացուկները հեռանկար չունեն՝ թեկուզ միլիոն ծախսեն, կամ միլիարդ ծախսեն»:
Պետք է հիշեցնել, որ երբեք չի կարելի թերագնահատել այլոց ուժն ու հնարավորությունները, այդպես թերագնահատվել էր դեռևս 2008 թվականին, երբ մերժված և հրաժարական տված Լևոն Տեր-Պետրոսյանը կարողացավ հզոր շարժում սկսել, իր շուրջ հավաքեց կադրային հզոր բանակ և ստացավ հանրության սատարումը: Ի՞նչ եղավ հետո՝ հարցի այլ կողմն է, բայց այն, որ Լևոն Տեր-Պետրոսյանը վերադարձավ մեծ քաղաքականություն ոչ մանր քայլով՝ անհերքելի իրողություն է:
Այժմ գոռոզամտացած վարչապետը կարծում է, թե այլևս անհնար է՝ իր դեմ դուրս գա որևէ մեկը, առավել ևս՝ նախորդները, սակայն պատմությունը դասեր քաղելու համար է և հետահայաց նետելով քաղաքական հոր՝ Լևոն Տեր-Պետրոսյանի անցած ուղուն, նա չպետք է բացառի քաղաքական հայտ ներկայացրած, օրինակ՝ Քոչարյանի վերադարձը, իսկ եթե բացառում է՝ ուրեմն ուշիմ և հեռատես գործիչ չէ: Քանի որ Նիկոլ Փաշինյանի թիմի անգործությունն արդեն իսկ հանգեցնում է նրան, որ ոչ թե ժողովուրդը ուզելու է ընդամենը նոր ու ավելի ուժեղ ղեկավար ընտրել և առաջընթաց անել, այլ մեկին, ով պարզապես այլընտրանք կլինի այս իշխանությանը:
Խոսում է նաև, թե չեն կարող նախորդները վերադառնալ թեկուզ միլիարդավոր գումարներ ծախսելու շնորհիվ, սակայն պետք է հիշեցնել, որ ինքը հանրության տարբեր շերտերի հետ առնչություն ունի, իսկ փող կամ շատ փող սիրող մարդկանց պակաս մեր երկրում չկա: Ինչպես ասում էր՝ Մեսչյանն իր երգերից մեկում՝
«Մնացածը վաճառվում է,
Անաստված այս աշխարհում...:
Մնացածը վաճառվում են,
Եվ բոլորն են վաճառվում»
Ինչքան էլ այսօր Փաշինյանը կարծի, որ կերտել է անկաշառ և դուխով քաղաքացի, և այսօր ինքը իրավագիտակից քաղաքացիների երկրում է ապրում, պետք է ցավով փաստենք, որ դա խորը մոլորություն է...
Իրականում, «հին համակարգի բովանդակային մնացուկները» ոչ միայն վաղը չեն կարող իրենց ասելիքը ասել, նրանք անգամ այսօր են կարողանում օրակարգ թելադրել: Օրինակ՝ Փաշինյանը չունի գոնե մեկ յուրային դիվանագիտական կորպուսում և ԶՈւ-ում:
Հարց կարող է առաջանալ՝ իսկ նախարարնե՞րը: Հակառակ հարցը չի ուշանա՝ իյա, իրո՞ք:
NEWSPRESS.am