Իսկ Մարությանի ձեռքերը կհասնե՞ն իր նշանակած թաղապետին ու ավելի խոշոր «ձկներին»
Երևանի քաղաքապետ Հայկ Մարությանն, ով արդեն մի քանի օր շարունակվող բողոքի ակցիայի մասնակիցների հետ խուսափում է հանդիպելուց ու այնտեղ է ուղարկում թաղապետերի, քաղաքապետարանի տարբեր վարչությունների աշխատակիցների, համարձակորեն Հ1-ի եթերում հարցազրույց տվեց՝ իր տպավորությամբ փակելով ապամոնտաժման թեման առհասարակ։
Մարությանը հասկացրեց բողոքի ակցիա անող, ոստիկանների կողմից բռնությունների և քաշքշոցների ենթարկվող սրճարանատերերին ու աշխատակիցներին, որ այդ թեման փակված է՝ քանդելու են և վերջ, և դա է պահանջում հանրության շահը։
Մարությանն, իհարկե, լավ չէր պատրաստվել այս հարցազրույցին՝ իրար հակասող մի շարք մտքեր հնչեցրեց։
Օրինակ՝ մեկ ասաց, որ սրճարանատերերի հետ ոչ մի կոնտակտի դուրս չեն եկել, մեկ էլ շարունակեց, թե մեր աշխատակիցները նրանց հետ եղել են մշտապես կոնտակտի մեջ, ու հեռուստադիտողներիս մեջ հարցական մնաց՝ հիմա կոնտակտի դուրս եկե՞լ են, թե՞ ոչ։
Դատելով «Ջազզվե» ընկերության համասեփականատեր Արմեն Պետրոսյանի տարածած հայտարարությունից, որում ասել է՝ «ցավոք, այս անգամ մեզ հետ երկխոսել չկամեցան ու որոշեցին շփվել ուժի լեզվով», կարելի է ենթադրել, որ չեն հանդիպել։
Մարությանը նաև ստում է՝ սրճարանատերերի հետ հանդիպման իր պատրաստակամության մասին, ասում է՝ ցանկացել է հանդիպել, սակայն նրանց կողմից որևէ քայլ այդ ուղղությամբ չի եղել, մինչդեռ սեփականատերերն անգամ ավագանու որոշ անդամների են որպես միջնորդ մեջտեղ բերել նման հանդիպում կազմակերպելու համար, սակայն Մարության Հայկը խուսափել է որևէ հանդիպումից։
Հանդիպեր, ինչ ասեր՝ չէ՞ որ քաղաքապետ դառնալուն նախորդած 12-օրյա քարոզարշավի ժամանակ Հայկ Մարությանը չէր ասել, որ հենց քաղաքապետ դարձավ, քանդելու է սրճարաններն ու մարդկանց թողնի անգործ։
Հ1-ի եթերից Հայկ Մարությանը հավատացրեց, որ Օպերայի հարակից տարածքների սրճարանների ապամոնտաժումը դեռ սկիզբն է, այն շարունակական է լինելու։
Հիմա հարց է առաջանում՝ արդյոք քաղաքապետը կապամոնտաժի՞ նաև Կենտրոն վարչական շրջանի ղեկավար Վիկտոր Մնացականյանին պատկանող սրճարանը, որը ևս կառուցվել է բնության հաշվին։ Կամ արդյոք Հայկ Մարությանի ձեռքերը կհասնե՞ն ավելի խոշորների կողմից կառուցված սրճարաններին, թե՞ դրանք նա կշրջանցի։
Մի անոմալ բան ևս՝ քաղաքապետն ասում է, որ գործ է գտնելու անգործ մնացած աշխատակիցների համար, իսկ արդյոք գործ գտնելը քաղաքապետի գործառույթների մե՞ջ է մտնում։