Սխալ է ծխելու դեմ պայքարելու համար՝ հարվածել աղքատ բնակչության գրպանին
Եվրոպական գիտական հանդեսներից մեկը հրապարակել է մի տեղեկատվություն, ըստ որի, օդի աղտոտվածությունից ավելի շատ մարդ է մահանում, քան ծխախոտի ծխից։
Ըստ վիճակագրության, տարեկան, օդի որակի հետ կապված խնդիրներով պայմանավորված հիվանդություններից աշխարհում մահանում է մոտ 9 միլիոն մարդ, իսկ ահա ծխախոտի օգտագործումով պայմանավորված հիվանդություններից մահացությունը 7,5 միլիոն է մոտ։ Ըստ նույն վիճակագրության, որը, համաձայն հրապարակման, հիմնված է Առողջապահության համաշխարհային կազմակերպության իրականացրած ուսումնասիրությունների վրա, միայն Եվրոպայում` օդի որակի հետ կապված խնդիրներով պայմանավորված հիվանդություններից մահացածների թիվը կազմում է մոտ 800 հազար մարդ։ Այս ամենից կարելի է եզրակացնել, որ բնապահպանական հիմնական խնդիրներից մեկն համարվող օդի աղտոտվածությունը շատ ավելի լուրջ խնդիր է այսօր աշխարհում, քան ծխախոտ ծխելը։ Իհարկե, ծխելը վնասակար է առողջության համար, բայց և չպետք է նայել միայն մեդալի մի երեսը։ Չէ՞ որ կա նաև մյուս կողմը։
Առողջապահության նախարար Արսեն Թորոսյանն օրերս հայտարարել է, որ եթե Հայաստանում ծխախոտը դառնա 2000 դրամ մեկ տուփը, ապա հինգ տարուց ծխողները Հայաստանում կտրուկ կքչանան և կկազմեն 32 տոկոս ընդամենը։ Ծխելու դեմ պայքարելը լավ է, սակայն հենց նախարարի խոսքերին հղում տալով, արդյունքը լինելու է հինգ տարուց։ Իսկ այդ հինգ տարիներին ծխողների ընտանիքները, օրինակ, ի՞նչ զրկանքներ են կրելու, մինչև հայրերը, եղբայրները կամ ամուսինները հասկանան, որ երկու հազար դրամ մեկ տուփի համար վճարելը, օրինակ` մարզերում՝ մեկ ընտանիքի ապրելու օրապահիկ սննդի գումարին համարժեք է։ Այլ կերպ ասած, հանրապետության բնակչության սոցիալ-տնտեսական վիճակը հաշվի առնելով, արդյո՞ք ճիշտ մոտեցում է դնել ու նման կերպ կտրուկ գնաճով փորձել զսպել ծխողին։ Ըստ էության, արդարացի չէ։ Ի վերջո, մեկ օրում հնարավոր չէ ծխելը թողնել, իսկ օրական մեկ տուփն արդեն օրական -2000 դրամ է լինելու առանց այն էլ չքավոր ժողովրդի համար։ Իսկ այդ 2000 դրամով կարելի է գնել հաց, մակարոն, ձեթ և այլն։ Ինչևէ։ Իսկ ի՞նչ է անելու Առողջապահության նախարարությունն, ասենք, օդի աղտոտվածությամբ պայմանավորված քաղցկեղի տարածման դեմն առնելու, թոքային հիվանդությունների դեմն առնելու կամ այլ հիվանդությունների դեմ պայքարելու համար, որոնց հիմքում օդի աղտոտվածությունն է կամ բնապահպանական մնացած ֆակտորները։
NEWSPRESS.am