Օպերայի հարակից տարածքից բերման ենթարկված անձանց հարցով ՄԻՊ ներկայացուցիչները ոստիկանությունում են
Օպերայի հարակից տարածքից բերման ենթարկված անձանց հետ կապված՝ Մարդու իրավունքների պաշտպանի ներկայացուցիչները գտնվում են Ոստիկանությունում: Ստացվել են ահազանգեր Պաշտպանի աշխատակազմ: Այս մասին հայտնում են ՄԻՊ գրասենյակից:
Այցը կապված է ազատությունից զրկված վիճակում գտնվող անձանց իրավունքների երաշխավորման հետ:
Նշենք, որ Օպերայի մերձակայքում՝ անմիջապես Ազատության հրապարակին հարող հատվածում, քաղաքի սեփականությունը հանդիսացող հողամասերը վարձակալած և սրճարանային բիզնես ծավալած տնտեսվարողները քաղաքապետարանի համապատասխան ստորաբաժանումից տարվա սկզբին ծանուցում էին ստացել, որով առաջարկվում էր նրանց հրաժարվել վարձակալության իրավունքով տրամադրված հողամասերի մի մասից:
Երեկ մեկնարկած ապամոնտաժման աշխատանքներն ուղեկցվել էին սրճարանների աշխատակիցների բողոքի ակցիաներով, լարված իրավիճակ էր ստեղծվել:
Ավելի ուշ աշխատանքները դադարեցվել էին, և սրճարանների ներկայացուցիչների մասնակցությամբ Երևանի քաղաքապետարանում քննարկում էր հրավիրվել:
Այսօր քաղաքապետարանը վերսկսել էր ապամոնտաժման աշխատանքները, որոնք ուղեկցվեցին բախումներով: Ոստիկանություն է բերվել 16 քաղաքացի: