Սերժ Սարգսյանը Ռոբերտ Քոչարյանի դեմ ցուցմունք չի տվել․ փաստաբան
ՀՀ երկրորդ նախագահ Ռոբերտ Քոչարյանի դատական նիստը տեխնիկական պատճառներով հետաձգվել է։ Այդ մասին լրագրողների հետ զրույցում ասաց Քոչարյանի պաշտպաններից Հայկ Ալումյանը։
Նա հիշեցրեց, որ միջնորդություն էր ներկայացվել Ռոբերտ Քոչարյանի համար, որպեսզի խափանման միջոց ընտրված կալանքը երկարաձգվի 2 ամսով, ինչին փաստաբանական խումբը դեմ է։ Հայկ Ալումյանը տեղեկացրեց, որ վաղը՝ մարտի 14-ի դատական նիստում կհնչեն իրենց գնահատականները։
Նա նաև հայտնեց, որ Ռոբերտ Քոչարյանն այսօրվա նիստին չի մասնակցել։
Լրագրողների հարցին, թե բացի Արշակ Կարապետյանի ցուցմունքից, այլ ինչ ցուցմունքներ կան Ռոբերտ Քոչարյանի դեմ, Ալումյանը պատասխանեց. «Կարող եմ ասել, որ անգամ Արշակ Կարապետյանի ցուցմունքներն այնպիսինը չեն, որի վրա կարելի էր կառուցել այս մեղադրանքը՝ Սահմանադրական կարգի տապալման հետ կապված: Այս մեղադրանքն ինքն իրենով բացարձակ անհեթեթ է, ոչ մի ընդհանուր բան չունի Քրեական օրենսգրքի այդ հոդվածի հետ: Մենք հիմիկվանից ուզում ենք հասկանալ՝ ինչի վրա է հիմնվելու մեղադրանքը, ցանկացած ցուցմունք, որ կարդում ենք, մենք հասկանում ենք, որ այս ցուցմունքն անգամ ամենակողմնակալ ձևով գնահատելու դեպքում չպետք է որ ծառայի մեղադրանքի նպատակով: Այսպես է, հավանաբար, նախատեսված, որ ուժային ձևով լուծել խնդիրը, այսինքն՝ գործն ուղարկել դատարան, հետո ճնշել այնքան, մինչև դատարանը մեղավոր ճանաչի պարոն Քոչարյանին, ուրիշ ձև չկա»,- ասաց Ալումյանը:
Արձագանքելով լուրերին, թե ՀՀ երրորդ նախագահ Սերժ Սարգսյանը ցուցմունք է տվել Ռոբերտ Քոչարյանի դեմ՝ Ալումյանն ասաց, որ նման բան չկա։
«Սերժ Սարգսյանը ցուցմունք է տվել գործի շրջանակում, սակայն, նա Ռոբերտ Քոչարյանի դեմ ցուցմունք չի տվել, բայց էլի կրկնեմ, որ հավանաբար այսօրվա մեր վարույթ իրականացնող մարմինը և դատախազությունը հույս են դրել, որ գործը դատարան ուղարկելուց հետո անհաժեշտ ճնշումներ կլինեն դատավորի նկատմամբ և այս գործը այսպես ասած կանցկացնեն»,- ասաց Ալումյանը: