Պարո՛ն Տոնոյան, մենք Ձեզ զինվոր ենք տվել, որ Ձեր բժիշկ կոչվածները դիակ սարքե՞ն
Բանակում կարծես իրավիճակ չի փոխվել. նույն բարձիթողի վիճակն է, ինչ որ այս իշխանությունների տարբեր օղակներում: Դեռ չէինք հարմարվել այն փաստին, որ զինծառայողի մահվան լուրն էին թաքցրել հանրությունից, հիմա էլ լսում ենք ծեծի և զինվորին նվաստացնելու փորձի մասին:
Այսպես. օրեր առաջ, իրեն «խելոք չպահելու համար» բանակում դաժան ծեծի են ենթարկել զինծառայող Նարեկ Գրիգորյանին, ում ծառայությանն են տարել առանց այն էլ առողջական բազմաթիվ խնդիրներով: Զինծառայողը հոգեկան առողջության հետ կապված խնդիրներ ունի, բանակ զորակոչվել է հունվարի 24-ին, իսկ արդեն փետրվարի 10-ից 19-ը գտնվել է Կանազի հոգեբուժարանում, ապա 15 օր Մուրացանի նյարդաբանական բաժանմունքում է անցկացրել, դրանից հետո բուժումը շարունակվել է Սիսիանի հոսպիտալում, որտեղ բուժման փոխարեն ծեծի է արժանացել:
Զինվորի և կապիտան Արտակ Աղաբեկյանի միջև վեճ է առաջացել «շարքում ուղիղ չկանգնելու և վարատնիկի անփութության» համար: Կապիտանը զինվորին նախ ձեռք է առել, ապտակել, այնուհետև հարվածներ հասցրել կրծքավանդակի, գլխի հատվածում, մինչ այժմ զինվորի վրա կան կապտուկներ, իսկ մարմնի ձախ հատվածը ամբողջ երկայնքով թուլացած է:
Անձամբ զանգահարել եմ Արտակ Աղաբեկյանին՝ լսելու նաև իր տեսակետը, սակայն հարցը սելուց հետո անջատեց հեռախոսը և անհետացավ:
7Գ դասակարգման մեջ գտնվող, 55Ա (գիշերամիզություն) և բազմաթիվ այլ խնդիրներ ունեցող զինվորն այսօր Սիսիանի հոսպիտալի թերապևտիկ բաժանմունքում է և դիմակայում է ծեծի հետևանքով ստացած ցավին:
Խոսել եմ նաև հոսպիտալի պետ Կարեն Գրիգորյանի հետ, ով ինձ հետ զրույցում ասում էր՝ «Ես տեղյակ եմ այդ պատմությունից, երեխեն իրան չարաճճի ա պահել, որի արդյունքում կոնֆլիկտ ա առաջացել»:
Ի դեպ, նույն Կարեն Գրիգորյանը դեպքի հաստատումից հետո խնդրում էր, որ նյութը չհրապարակվի, սակայն ինձ համար կարևոր է յուրաքանչյուր զինվորի հոգեկան, ֆիզիկական առողջությունը և անհրաժեշտ եմ համարում խնդրին անպայման անդրադառնալը:
Հիմա հարց՝ բժիշկը կյանք պետք է փրկի՞, թե՞ մարդ ծեծի: Ի՞նչ է կա տարվում այսօր բանակում, մեկի որդուն ուղղաթիռով են գնում ծննդյան օրը նշելու, մյուսինին ծեծո՞ւմ, սա՞ է ձեր հավասարությունը:
Պարո՛ն Տոնոյան, պահանջում եմ Ձեր ուշադրությունը այս հարցի վրա, իրավական ընթացակարգ եմ ակնկալում և պահանջում եմ դատաբժշկական փորձաքննության անցկացում և պատասխանների հրապարակում:
Մենք պետք է իմանանանք, թե ինչ բանակի ենք զինվոր վստահում, և թե ինչերի միջով են անցնում մեր զինվորները այդ երկու տարին:
Այս կերպ հաստատ դուք պատերազմ չեք հաղթի, դուք սպանում եք մարտական և հայրենասիրական ոգին, զինվորը բանակում չպետք է ծեծվի և նվաստացվի: Ավելին՝ առողջական խնդիրներով զինվորները առողջների փոխարեն չպե՛տք է զորակոչվեն:
NEWSPRESS.am-ի հիմնադիր-տնօրեն՝
Արմենուհի (Արիանա) Հովսեփյան