500-600 աշխատող կմնա անգործ՝ տնտեսական հեղափոխության շրջանակում
Հարկային օրենսգրքում փոփոխություններ են կատարվել, որոնցով նախատեսվում է կիրառել ակցիզային հարկ ԱՏԳ ԱԱ 2202 ապրանքային դասակարգման ըմպելիքների նկատմամբ, իսկ դրանք շաքար, համային ու հոտային հավելումներ պարունակող գազավորված ըմպելիքներն են։
Այդ ըմպելիքների արտադրությամբ զբաղվող տնտեսվարողներն այսօր հավաքվել են կառավարության շենքի դիմաց և պահանջել հարկային այդ դրույթի փոփոխությունը, հակառակ դեպքում՝ այդ փոփոխությունը բերելու է ըմպելիքների թանկացման։
Փոքր և միջին բիզնեսով զբաղվող այս տնտեսվարողները չեն պատկերացնում իրենց հետագա գործունեությունը, քանի որ պնդում են, որ պետությունը ստեղծել է այնպիսի մի իրավիճակ, որ իրենք պետք է աշխատեն միայն հարկ տալու համար։
Գազավորված ըմպելիքների արտադրությամբ զբաղվողներից բացի, կառավարության շենքի դիմաց էին հավաքվել նաև գրավատների ու արտարժույթի փոխանակման կետերի աշխատակիցները։
Հարկային օրենսգրքում առաջարկվող փոփոխություններով՝ 60 անգամ ավելացել է գրավատների ու փոխանակման կետերի համար տարեկան պետական տուրքը։
Գրավատների համար ներկայիս 100 000 դրամի փոխարեն կսահմանվի 6 մլն, փոխանակման կետերի համար՝ 50 000-ի փոխարեն 3 մլն դրամ պետական տուրք:
Տնտեսվարողները պնդրում են, որ եթե հարկային մարմինները չվերանայեն իրենց առաջարկած փոփոխությունները, իրենք ստիպված են լինելու իրենց բիզնեսները փակել և հեռանալ երկրից՝ հրաժեշտ տալով նաև իրենց աշխատակիցներին։
Ստացվում է՝ պետությունն իր առաջ դրել է խնդիր՝ բոլոր հնարավոր և անհնար միջոցներով հարկերն ավելացնել և ոչինչ, որ դա բերելու է որոշ մարդկանց բիզնեսների փակման։
Պետական կառավարման ապարատում 300 -ից ավելի կրճատված աշխատակիցների շարքն առաջարկվող այս փոփոխություններով հավանաբար կհամալրեն ևս 300-ը։ Սա բացարձակապես որևէ աղերս չունի կառավարության ղեկավարի արած քայլի՝ հայտարարած տնտեսական հեղափոխության հետ։
Մի՞թե կարելի է տնտեսական հեղափոխություն անել երկրում բիզնեսներ փակելով ու մարդկանց գործազուրկ դարձնելով, և դա այն դեպքում, երբ պետությունը չի ստեղծել կրճատած թվի գոնե կեսի չափ աշխատատեղ երկրում։
Որտե՞ղ են աշխատելու գործազորւկները, կամ ինչպե՞ս են իրենց գոյությունը փորձելու պահպանել նոր Հայաստանում, որտեղ հավատալով մեկ մարդու խոստումներին՝ նրան ու նրա անտաղանդ թիմին են տվել ամենաթանկ բաներից մեկը՝ իշխանությունը։
Ի՞նչ պատասխան է տալու Փաշինյանը օրվա հացից կտրված այս քաղաքացիներին։