Լիովին բացահայտվեց ՀՀ վարչապետի և ՀՀ ԱԳՆ-ի կողմից վարած պարտվողական քաղաքականության իրական դեմքը. ԵՀՄՖ նախագահության հայտարարությունը
Եվրոպայի հայկական միությունների ֆորումի նախագահության հայտարարությունն Արցախի հարցում սկսված զարգացումների շուրջ
ԵԱՀԿ Մինսկի խմբի համանախագահների կատարած հայտարարությունը քողազերծեց Արցախի անկախության խնդրի շուրջ վերջերս ծավալված գործընթացները: Լիովին բացահայտվեց ՀՀ վարչապետի և ՀՀ ԱԳՆ-ի կողմից վարած պարտվողական քաղաքականության իրական դեմքը և պարզ դարձավ, որ մոտ ապագայում պետք է սպասել դեպքերի կտրուկ զարգացումների: Գործի դրվեցին Սերժ Սարգսյանի իշխանության կողմից ընդունված խայտառակ «նորացված Մադրիդյան սկզբունքները», որոնք մնացին «փուլային», թերզարգացած վիճակում:
Փաստորեն, ՀՀ այսօրվա իշխանության առաջարկը «տարածքներ խաղաղության դիմաց» թեզն է, որը հենց առաջին օրերից սկսվեց մատուցվել տարբեր տեղերից և տարբեր ձևերով: Հատկանշական էր վարչապետ Փաշինյանի հայտարարությունն առ այն, որ նա չի կարող Արցախը ներկայացնել Ալիևի հետ բանակցությունների ժամանակ, բայց նույն պահին ԱԳ նախարարի տարբեր ձևաչափերով հանդիպումները նվիրված էին լինում հենց Արցախի խնդրին. սա արդեն «ջայլամային քաղաքականություն» էր, որի արդյունքն արդեն տեսանք Մինսկի խմբի օրերս կատարած հայտարարության համատեքստում: Նշենք, որ միջազգային հանրությունը ևս տրամադրված է Արցախի հարցում նույն կերպ, ինչպես Մինսկի խումբը: Սա լուրջ արհավիրք է, եթե հաշվի առնենք, որ այս հարցում լռում է նաև մեր ռազմավարական դաշնակիցը՝ Ռուսաստանը, որի հետ գոնե մեր ԱԳՆ-ը պետք է դիվանագիտական աշխատանքներ վարեր ու մեզ համար ձեռնտու լուծումներ պատրաստեր:
Այս ձախողված իրավիճակում ողջ աշխարհասփյուռ հայությունը պետք է որոշում ընդունի. տարածքները զիջել խաղաղության դիմաց, թե՞ պատրաստվել պատերազմի: Ի՞նչ է նշանակում տարածք զիջել: Նշանակում է ժամանակավորապես ունենալ Արցախ՝ Մայր հայրենիքին կապող մի նեղ գոտիով, ստանալ ժամանակավոր և անհասկանալի մի կարգավիճակ ու պատրաստվել հանրաքվեի՝ ազերի փախստականներին ետ ընդունելուց հետո միայն: Ինչքա՞ն փախստական կվերադարձնի Ադրբեջանն Արցախ. անկասկած շատ ավելին, քան կար Արցախում, ասենք, հարյուր հազարավոր: Այսինքն` սպասվող հանրաքվեի արդյունքն արդեն պարզ է: Ադրբեջանը կբավարարվի արդյո՞ք ազատագրված տարածքները ետ ստանալով և Արցախն օկուպացնելով, թե կփորձի իրականացնել, Զանգեզուրը ձեռք գցելու միջոցով, թրքալեզու երկրները կապելու պանթուրքական վաղեմի երազանքը: Սա նեոօսմանյան դոկտրինայի հիմքում ընկած կարևոր պայմանն է: Կասկածից վեր է, որ Ալիևի երազանքը հենց սա է:
Որքանո՞վ է պատրաստ, այսօրվա մանկամիտ և ոչ արհեստավարժ իշխանության կողմից «սևերի» և «սպիտակների» բաժանված, Հայաստանը դիմակայել սպասվող արհավիրքին:
Այս պահին հարցն ունի հռետորական պատասխան. ապրիլյան քառօրյա պատերազմը ցույց տվեց, որ ժողովուրդը պատրաստ է պաշտպանելու Հայրենիքն անվերապահորեն:
Սակայն սա շատ քիչ է: Լիովին պատրաստ լինելու համար, մեր կարծիքով, անհրաժեշտ են հետևյալ քայլերը.
- վարչապետը պետք է անհապաղ ներկայացնի ժողովրդին իրերի իրական վիճակը` ստանձնելով Արցախի շուրջ խնդրի լուծման պարտականությունը,
- դադարեցնի ոխակալության և վենդետայի տարրեր պարունակող անփառունակ հետապնդումները և հասկանա, որ ՀՀ վարչապետը պետք է լինի ողջ հայության վարչապետը, եթե, իհարկե, ունի այդ կարողությունը,
- պետք է դիմի արտերկրի հայությանը` կոչով, որ երկիրը վտանգի մեջ է ու փրկության կարիք ունի: Անհրաժեշտ է թռիչքային զարգացնել ռազմարդյունաբերությունը ֆինանսական միջոցների ներգրավվման միջոցով և անմիջապես վերաբացել ռազմավարական օբյեկտները` ի դեմս Նաիրիտի, Վանաձորի քիմկոմբինատի և այլ ձեռնարկությունների, որոնք և՛ կտրուկ կզարգացնեն մեր տնտեսությունը և՛ կօգնեն նոր ռազմարդյունաբերության ձևավորմանը: Այս խնդրի լուծումը պետք է սկսել, նախ և առաջ, համապատասխան նախարարություններում արհեստավարժ կադրեր ներգրավվելու և, հատկապես, Պաշտպանության նախարարությունում ավանդականորեն զարգացած կոռուպցիան արմատախիլ անելու միջոցով,
- պետք է հիմնովին փոխվի ԱԳՆ-ի ղեկավար կազմը և մի շարք կոռումպացված դեսպաններ պետք է պատասխանատվության ենթարկվեն, որից հետո անհրաժեշտ է նորացված դիվանագիտական կադրերով վարել նորացված արտաքին քաղաքականություն, որը հիմնովին տարբեր կլինի «էդիկնալբանդյանական» և նրա այսօրվա հետևորդների անատամ, պարտվողական դիվանագիտությունից,
- պետք է ներգրավել արտերկրի հայկական լոբբիստական կառույցներին` համաշխարհային քաղաքական հզոր կենտրոնների հետ հայաստանանպաստ զարգացումների ապահովման նպատակով աշխատանքներ վարելու համար,
- անհրաժեշտ է ստեղծել համահայկական կոորդինացիոն մարմին` ընդգրկելով արտերկրի հայության առաջնորդներին և կարող ուժերին` Ադրբեջանի և Թուրքիայի ռազմական դիմակայությանը պատասխանելու համար: Այդ մարմինը պետք է արագորեն ստեղծի նոր հայեցակարգ ողջ հայության ռեսուրսների ներգրավման համար:
Վերոնշյալ կետերը խիստ անհրաժեշտ քայլերի կարևոր, բայց ոչ լրիվ ցանկն են. ամբողջացնելու համար անհրաժեշտ են քննարկումներ և ուժերի մոբիլիզացում:
Եվրոպայի հայկական միությունների ֆորումը (ԵՀՄՖ) պատրաստ է իր վրա վերցնել արտերկրի հայության մոբիլիզացիան և աշխատանքների կոորդինացումը ու անհամբեր սպասում է վարչապետի և կառավարության համաձայնությանը` աշխատանքների համատեղ առաջխաղացման նպատակով:
ԵՀՄՖ նախագահություն
ԵՀՄՖ նախագահ`
դոկտոր Աշոտ Գրիգորյան
11.03.2019թ.
Բրատիսլավա