«Ջանջուղազյան, իջիր». գրավատների աշխատակիցները կառավարության դիմաց «դըմփ-դըմփ-հու» արեցին
Կառավարության շենքի դիմաց բողոքի ակցիա են իրականացնում գրավատների և փոխանակման կետերի աշխատակիցները: Նրանք բողոքում են «Պետական տուրքի մասին» ՀՀ օրենքում սպասվող փոփոխությունների դեմ, որով նախատեսվում է շուրջ 60 անգամ ավելացնել գրավատների պետական տուրքերը:
Նրանք պահանջում էին ֆինանսների նախարար Ատոմ Ջանջուղազյանի հետ հանդիպում, քանի որ նա է նախաձեռնության հեղինակը: Իսկ ավելի ուշ ակցիայի մասնակիցները նաև պահանջում էին, որ իջնի և իրենց հանդիպի վարչապետի տեղակալ Մհեր Գրիգորյանը, սակայն նրանք չէին իջնում ներքև:
«Ասում են՝ ժողովուրդ, ժողովուրդ, ի՞նչ ա, մենք էսքան մարդ ժողովուրդ չե՞նք, որ չեն իջնում»,-լրագրողների հետ զրույցում իր դժգոհությունը հայտնեց հավաքվածներից մեկը:
Կանանցից մեկն էլ նկատեց, որ եթե այսպես շարունակվի՝ կարտագաղթեն:
«Սաղ օրը հեռուստացույցով ասում են՝ եկեք, եկեք, գան ի՞նչ անեն: Ինչի՞, չե՞ն տեսնում, որ մենք էսքան գալիս կառավարության դիմաց բողոքում ենք. չե՞ն տեսնում, որ ամեն ինչ այնպես չէ, ոնց ներկայացնում են: Մարդիկ դրսում աշխատանք ունեն, գան՝ ի՞նչ անեն»,- ասած կինը:
Ակցիայի մասնակիցները նկատում են, որ այս որոշման ընդունմամբ գործազրկության թիվն աճելու է, քանի որ բոլոր գրավատները կփակվեն ու մարդիկ կզրկվեն աշխատելու հնարավորությունից:
«Եկեք թարս նստենք, դուզ խոսենք, ոնց ասում են, 20 տարի Հանրապետական կուսակցությունը, որին բոլորս մեղադրում ենք օյ–օյ երկիրը քանդել են, տնտեսավարողներին ճնշել են, էդքանը չե՞ն մտածել, որ կարելի է սրանց վրա ֆինանսական բեռ դնենք, որ ճռռալով տան, որ քսան տարի մտածել ենք՝ թալանչի են»,- ասաց բողոքի ակցիայի մասնակիցներից մեկը՝ Հայկ Սահակյանը:
Հարցին լուծում տալու համար, ակցիայի մասնակիցները պատրաստ են մինչև անգամ փողոց փակել:
«Բա ի՞նչ պետք ա անենք, չենք նստելու ու սպասենք, թե էլ ինչ որոշումներ պետք ա ընդունեն, որ մեր կյանքն ավելի դժվարացնեն»,-ասաց ակցիայի մասնակիցը:
Նրանք կառավարության դիմաց սկսեցին շարժման խորհրդանիշ դարձած հայտնի «Դըմփ-դըմփ-հու»-ն:
Կառավարությունը «Պետական տուրքի մասին» ՀՀ օրենքում փոփոխություններ և լրացումներ կատարելու մասին» նախագծով պատրաստվում է 60 անգամ, այն է՝ 6000 %-ով, ավելացնել նշյալ ոլորտների պետական տուրքը, ըստ որի գրավատների համար ներկայիս 100 000 դրամի փոխարեն կսահմանվի 6 000 000 (վեց միլիոն), փոխանակման կետերի համար՝ 50 000-ի փոխարեն 3 000 000 (երեք միլիոն) դրամ պետական տուրք: