Վտանգ կա, որ Ղարաբաղյան կարգավորման գործընթացում Փաշինյանի՝ սեփական ուժերը գերագնահատելու հետևանքով մեզ վերադարձնում են ելակետային դիրքերին. Աշոտյան
Մինսկի խմբի համանախագահների վերջին հայտարարությունը խիստ ուշագրավ է։ Այդ մասին ֆեյսբուքյան իր էջում գրառում է արել ՀՀԿ փոխնախագահ Արմեն Աշոտյանը:
«Հայաստանում իշխանափոխությունից հետո սա առաջին ծավալուն, ծրագրային և համեմատաբար ուղիղ խոսքն է բանակցային գործընթացի առկա իրավիճակի մասին։
Ավելի բաց եթե ասեմ, գնահատում եմ այն որպես բանակցային գործընթացը պահպանելու եւ ռազմական գործողությունների վերսկսումը կանխելու փորձ՝ կողմերին ուղղված հստակ ուղերձներով։
Վտանգ կա, որ Ղարաբաղյան կարգավորման գործընթացում Նիկոլ Փաշինյանի շտապողականության, ավելորդ ինքնավստահության եւ սեփական ուժերը գերագնահատելու հետեւանքով գրեթե մեկ տարի անց մեզ վերադարձնում են ելակետային դիրքերին, ցավոք, առանց Վիեննայի, Սանկտ Պետերբուրգի եւ Ժնեւի պայմանավորվածությունների կատարման անհրաժեշտության մասին հիշատակման»։