Ինչ շահեր է հետապնդում Փաշինյանը՝ Դավիթ Սանասարյանին «փուռը տալով»
Պետական վերահսկողական ծառայությունում տեղի ունեցած ձերբակալությունների և ԱԱԾ գործողությունների ֆոնին, ինչպես և կարելի էր սպասել, ակտիվացել են հանրային սեկտորի այն ներկայացուցիչները, որոնք ինչ-որ կերպ կապված են դրսի հիմնադրամների հետ, սնվում են դրանցից ու այսպես ասած՝ «բարոյական պարտք» ունեն Սանասարյան Դավիթի թասիբը պաշտպանելու։ Այս աղմկոտ պատմության ֆոնին նույնիսկ լուրեր տարածվեցին, որ ձերբակալվելու կամ նույնիսկ կալանավորելու որոշում է հնարավոր, որ կայացվի հենց Սանասարյանի հանդեպ։
Եղան նույնիսկ հրապարակումներ, որ նման որոշում կայացվել է, սակայն Նիկոլ Փաշինյանը վերջին պահին «ստոպ» է տվել գործընթացին, մտավախություն ունենալով, որ այդ ձերբակալությունը կարող է իր դեմ հանել, այսպես ասած, սորոսական հատվածին, որը բավականի ազդեցիկ է։
Այն, որ Փաշինյանի իշխանափոխությանը սորոսականները լուրջ դերակատարություն են ունեցել, հասկանալի է ինքնին։ Ու հիմա մի փոքր տարակուսելի է, թե ինչու է Փաշինյանը որոշել «փուռը տալ» իր նախկին զինակիցներին։ Ասել, որ զուտ իրավագիտակցության կամ օրենքի գերակայություն ապահովելու հարց է, սխալ կլինի։ Խնդիրը շատ ավելի լուրջ ու խորքային է։ Այս պատմությունն իրականում ունի աշխարհաքաղաքական ենթատեքստ։
Սեփական իշխանության պահպանման մարմաջով բռնված Փաշինյանը, ինչպես արդեն բազմիցս ենք նշել, հասկացել է, որ իր իշխանության հարատևության գաղտնիքները պահվում են ոչ թե Բրյուսելում կամ Վաշինգտոնում, որտեղից դեռ ամռանն ու աշնանը նրան հաջողություն էին ասել, այլ Մոսկվայում, որտեղ, հակառակի նման՝ նրան ոչ միայն չեն ընդունում, այլև տարրական վստահություն չունեն իր հանդեպ։ Ու այդ վստահության կամ թեկուզ բարեհաճությանն արժանանալու համար Փաշինյանը որոշել է պարզ ասած՝ «փուռը տալ» բոլոր նրանց, ովքեր ինչ-որ կերպ Մոսկվայի աշխարհաքաղաքական շահերի մեջ չեն տեղավորվում, ներառյալ՝ նաև Սորոսի հայաստանյան հինգերորդ շարասյունը ներկայացնող հանրային սեկտորի և ակտիվիստների շրջանակին, որոնց կարկառուն ներկայացուցիչը Դավիթ Սանասարյանն է։
Սակայն մյուս կողմից, նա հասկանում է նաև, որ կտրուկ «փուռը տալը» կարող է թանկ արժենալ իր համար և որոշել է աստիճանական «փուռը տալու» մարտավարությունը կիրառել, այսինքն՝ պահպանելով հիմնական ֆիգուրին, զրկել գործելու բոլոր հնարավորություններից։