Դա տղամարդուն սազական չէ․ Գևորգ Պետրոսյանը՝ «Իմ քայլի» պատգամավորին (տեսանյութ)
Այսօր՝ մարտի 5-ին, երբ ԱԺ նիստում քվեարկության դրվեց «Արհեստակցական միությունների մասին ՀՀ օրինագծում լրացումներ կատարելու մասին» օրենքի նախագիծը, այն ներկայացնող «Բարգավաճ Հայաստան» խմբակցության պատգամավոր Գևորգ Պետրոսյանը դիմեց «Իմ քայլը» խմբակցության պատգամավոր Արեն Մկրտչյանին։
Պետրոսյանը նկատեց, որ Մկրտչյանն իրեն թույլ է տվել միջանցքում հարցազրույց տալ իր ներկայացրած նախագծի մասին և կարծիք հայտնել՝ պատշաճ ներկա չլինելով նախագծի քննարկմանը։
«Նա հանձնաժողովի նիստին գալիս է ուշացումով, չի լսում իմ զեկույցը, որևէ բառ չի ասում նախագծի վերաբերյալ, բայց դրսում հարցազրույց է տալիս ու ասում, թե ԲՀԿ-ի այս օրինագծի նպատակն է աշխատողներին վերահսկողության ներքո պահելը»։
Արձագանքելով Պետրոսյանին՝ Արեն Մկրտչյանը նկատեց, թե հանձնաժողովում նախագծի քննարկման ժամանակ Գևորգ Պետրոսյանը 88 հոգանոց խմբակցությանը՝ «Իմ քայլին», անվանել է «դակիչ». «Ես ձեզ կոռեկտության կոչ եմ անում, այլապես ստիպված կլինենք ձեր հետ կոռեկտության դասընթաց անցկացնել և վերջում բանավոր-գրավոր քննություններ հանձնել»,- հայտարարեց երիտասարդ պատգամավորը։
Ավելի ուշ, ընդմիջումից հետո Գևորգ Պետրոսյանը պատասխանեց Մկրտչյանի «կոռեկտության դասեր» տալու «առաջարկին»՝ նկատելով նաև, որ լավ չէ, երբ իր հետևից են խոսում։
«Ես մտածում էի իմ վերջնական կրթությունը ստացել եմ, բայց պարզվում է՝ պարոն Մկրտչյանն իմ բացակայությամբ ինձ կոռեկտության դասեր է ցանկացել տալ։ Պարոն Մկրտչյան, Ձեր՝ ինձ «դասավանդելու» հավանականությունը այնքան խելամիտ է, որքան այն, որ շրջվեմ ու այս տախտակի վրա (ԱԺ ամբիոնն է ցույց տալիս) Այվազովսկու «9-րդ ալիքը» նկարեմ․ դա մեկ։ Եվ հետո՝ ի՞նչ է նշանակում իմ բացակայությամբ ինձ հեգնել։ Դա սազական չէ, ընդհանրապես տղամարդուն, առավել ևս՝ պատգամավորին»,-ասաց Գևորգ Պետրոսյանը՝ հորդորելով Մկրտչյանին կոռեկտության դասեր սովորել։
«Եթե ցանկանաք սովորել և չեք զլանա, կարող եք ԲՀԿ-ի դռները թակել՝ կօգնենք․ եղա՞վ»,-եզրափակեց Գևորգ Պետրոսյանը։