Ղուշչյանի առևանգումը, Ձկնկուլի ու Ճուտի սպանությունը. Ալեքսանյանին փրկում է միայն մուծվելը
Այսօր հեռուստամեկնաբան Համլետ Ղուշչյանը հարցազրույց է տվել և սկանդալ հարուցող հայտարարություն արել:
Ասել է, որ գործարար Սամվել Ալեքսանյանը գիշերով իրեն առևանգել, տարել է և ատրճանակը գլխին պահելով՝ ասել՝ կասես էն, ինչ քեզ կասենք. «Ես էդ բոլորի միջով անցել եմ, ես մահվան աչքերին եմ նայել, ասել եմ՝ կրակի, արա՛, որ բերել ես՝ կրակի՛, որովհետև հետո Աստված քեզ պատժելու է, թե ոչ մեկն էլ չպատժի»։
Ղուշչյանի այս հայտարարությանը իրավական երկրում պետք էր շատ արագ արձագանքեին համապատասխան մարմինները, սակայն մեզ մոտ՝ քար լռություն: Ալեքսանյանը մերոնքական է:
Ընտրողական վերաբերմունքը պայմանավորված է, թերևս, Ալեքսանյան-Փաշինյան բարձր մակարդակի հարաբերություններով՝ փողով: Դրանից բարձր այլ մակարդակ գոյություն չունի այս զույգի փոխհարաբերություններում:
Տպավորություն է՝ Ալեքսանյանի մուծած փողերը կուրացրել են վարչապետին: Բավականին շատ է խոսվում այն մասին, որ նախկին պատգամավոր Սամվել Ալեքսանյանն իր աջակցությունն է ցուցաբերում ներկայիս իշխանություններին: Ավելի կոնկրետ, մուծվում է, երևի թե, բիզնեսը պահելու համար:
Ոչ վաղ անցյալում հրապարակվեց «City of smile» հիմադրամի՝ 2018թ.-ի նվիրատուների ամբողջական ցանկը, որտեղից պարզ դարձավ, որ Ալեքսանյանների Ընտանիք բարեգործական հիմնադրամը 10,000,000.00 դրամ նվիրատվություն էր կատարել: Իհարկե, սա մուծման մի ձև է: Այս մեխանիզմը գործել է նաև նախկին իշխանությունների ժամանակ, մուծվում էին մեկ զանգով ստացված հրահանգի պատճառով: Իրավիճակը փոխվելուց հետո Սամվել Ալեքսանյանի մուծվելու արդյունքում նրա բիզնես գործունեության մեջ հարկայինը չի խառնվում, տիկին Աննան հագնում և գովազդում է Ալեքս տեքստիլի զգեստները և ջրվում կամ ընդհանրապես փակվում են Ալեքսանյանի անվան հետ կապված քրեական գործերը:
Ժամանակին, երբ սպանվեց Սամվել Ալեքսանյանի նախկին աշխատակից Արմեն Իսրայելյանը՝ Ձկնկուլը, թեման շնոհիվ Նիկոլ Փաշինյանի՝ բուռն քննարկման առիթ դարձավ: Մինչև սպանվելը Ձկնկուլը Փաշինյանի կայքին հայտնել էր՝ եթե իր հետ բան պատահի, մեղավորը Ալեքսանյանն է լինելու, ապա պատահեց անդառնալին՝ Մոսկվայում սպանվեցին Ձկնկուլը և Էդուարդ Նշանյանը, մականունը՝ Ճուտ: Սպանությունից հետո, այն ժամանակ դեռևս ԱԺ պատգամավոր Նիկոլ Փաշինյանը ԱԺ նիստի ժամանակ հայտարարեց, որ Արմեն Իսրայելյանի սպանության հետքերը բերում են Ազգային ժողով՝ ակնարկելով Սամվել Ալեքսանյանին: Այն ժամանակ Նիկոլ Փաշինյանը մեղադրում էր իրավապահ մարմիններին, գործի կարճումը համարում իրավապահ համակարգի ծախու լինելու անհերքելի ապացույց:
Իսկ ի՞նչ փոխվեց հեղափոխությունից հետո: Այսօր իրավապահ համակարգը ծախու չէ, դատավորները վարչապետից զանգեր չեն ստանում և յուրաքանչյուր իրավական խնդիր լուծվում է օրենքի տառին համապատասխան: Իսկ ինչո՞ւ չի բացվում քրեական գործը կամ ինչո՞ւ Ղուշչյանի արած բաց հայտարարությունը չի ընդունվում հանցագործության մասին հաղորդում՝ պատճառը նորից նորին սրբություն փողն է: Ալեքսանյանը մուծված է, Փաշինյանը կուրացել է մուծված փողերի պատճառով:
NEWSPRESS.am