Ինչ սև կատու է անցել Լևոնի և Նիկոլի միջև
Նիկոլ Փաշինյանը մարտի 1-ին հանդիպել է Հանրային խորհրդի անդամների հետ, գլխավորությամբ Վազգեն Մանուկյանի և այդ հանդիպման ընթացքում հետաքրքիր հայտարարություններ է արել։ Մասնավորապես, նա դիմել է Վազգեն Մանուկյանին, հիշեցրել իր ուղերձի խոսքերը և ասել, որ այդ ներողությունը հասցեագրված է նաև Վազգեն Մանուկյանին, քանի որ վերջինս որպես երկարամյա ընդդիմադիր գործիչ, զոհերից մեկն է եղել ընտրակեղծիքների։
Սա շատ հետաքրքիր հայտարարություն է իրականում, որն իր սուր ծայրով ուղղված է ՀԱԿ-ի և առաջին հերթին Լևոն Տեր-Պետրոսյանի դեմ, ում 96-ի ընտրությունները կեղծելով ՀՀՇ-ն և մյուս սատարողները կրկին բազմեցրին նախագահի աթոռին, այն դեպքում, երբ փաստացի հաղթանակ տարած թեկնածուն Վազգեն Մանուկյանն էր եղել։ Այնպիսի տպավորություն է, որ Նիկոլն ինչ-որ բանից նեղված է Լևոն Տեր-Պետրոսյանից, կամ երկուստեք նեղված են իրարից և հակադարձում են մեկմեկու կամ մեկմեկու դեմ դեմարշներ են անում։
Լևոն Տեր-Պետրոսյանը նախ հայտարարում է, որ Նիկոլն իրենը չէ, բավական ընդարձակ հոդված նվիրելով այդ թեմային, Նիկոլն էլ իրենով է անում Մարտի 1-ի հիշատակի օրը, ինչին Լևոն Տեր-Պետրոսյանը հայտարարում է, որ ատամնացավ ունի ու չի մասնակցի հիշատակի միջոցառումներին, այսինքն՝ «չի պարի Նիկոլի դուդուկի տակ այդ օրը»։
Ի պատասխան թերևս այս վերջին քայլի էլ հենց Մարտի 1-ի օրով Նիկոլը որոշում է սեղմել Լևոն Տեր-Պետրոսյանի և իր թիմի աշխատանքային կոշտուկը՝ հիշեցնելով 96-ի ընտրակեղծիքների մասին։
Արդեն գրել ենք, որ սա կարող է ունենալ տարբեր ենթատեքստեր։ Նախ, որ ինչ-որ վտանգի հոտ է առել առաջին նախագահն ու իրեն զատում է Նիկոլից, ապա, որ զատվում են իրարից, որպեսզի Նիկոլը Լևոնի հանդեպ եղած բացասական ընկալումն իր վրա չվերցնի ու շատ ավելի շուտ չփչանա, քան բնական էվոլյուցիոն ճանապարհով է փչանալու և ապա նրանց միջև սև կատու է անցել։
Ամենևին չենք բացառում, որ սա կարող է նաև որոշակի մանևր լինել։ Ի վերջո հայտնի մեթոդ է, չես ուզում, որ իմանան դաշնակիցդ է, ձևացրու, թե թշնամի եք։ Իհարկե, կա նաև մի կարծիք ևս, որը օրեր առաջ շրջանառության մեջ դրեց ԱԺ նախկին պատգամավոր Ռուբեն Հակոբյանն իր հարցազրույցներից մեկով։ Դա այն է, որ Փաշինյանն ունի անհասկանալի սովորություն, ամեն մեկի համար ասել վերջինիս համար ականջահաճո արտահայտություններ։ Սա էլ խոսում է շատ ավելի մեծ վտանգի մասին՝ կամ անսկզբունքայնության, կամ տարերային կառավարում իրականացնելու ռազմավարության, որը բուրում է կատարյալ ֆիասկոյով։
NEWSPRESS.am