Մարտի 1–ի գործով շատ հանգամանքներ դեռևս պարզված չեն․ ԼՀԿ անդամները հարգանքի տուրք են մատուցել
Թեև իշխանությունները պնդում են, թե Մարտի 1–ը բացահայտված է, սակայն «Լուսավոր Հայաստան» կուսակցության նախագահ Էդմոն Մարուքյանը վստահեցնում է՝ գործով շատ հանգամանքներ դեռևս պարզված չեն։
Նկատենք, որ այսօր, օրվա առիթով, ԼՀԿ անդամներն իրենց հարգանքի տուրքն են մատուցել Մարտի 1-ի զոհերի հիշատակին։ Նրանք նախ եղել են Երևանի Սբ. Սարգիս առաջնորդանիստ եկեղեցում, և մասնակցել հոգեհանգստի արարողությանը, այնուհետև եղել Մյասնիկյանի արձանի մոտ և ծաղիկներ դրել հուշարձանին։
Էդմոն Մարուքյանը լրագրողների հետ զրույցում հույս հայտնեց, որ դատարանում դեռ կտեսնեն Մարտի 1-ի կազմակերպիչներին և սպանողներին, սակայն, ըստ պատգամավորի, քանի դեռ Մարտի 1–ի գործի վերաբերյալ քիչ տվյալներ են հայտնի, այսօր հստակ հայտարարություններ չեն կաող անել այն մասին, թե ովքեր են սպանողները։
«Բազմաթիվ հանգամանքներ հայտնի չեն, դրա համար ես ասում եմ, որ պետք է սպասել գործի քննության ավարտին։ Մենք մինչ այժմ գիտենք, որ սահմանադրական կարգը տապալելու վերաբերյալ է մեղադրանք առաջադրված, դա գործի մի հատվածն է, իսկ մնացած մասով դեռևս տեղեկություներ չունենք»,- ասաց նա՝ հավելելով, որ երբ սկսվեն դռնբաց դատական նիստերը, կհետևեն ու կտեսնեն՝ բավարարու՞մ է արդյոք նիստերի ընթացքն իրենց, թե՞ ոչ։
Բացի այդ, նա նշում է նաև, որ գործով մոտ 150 մարդ է դատապարտվել։ Մարուքյանն ինքն անձամբ Վանաձորում Մարտի 1-ի գործով պաշտպանել է Լևոն Տեր–Պետրոսյանի վստահված անձանց։
«Հարկավոր է արդեն վերջակետ դնենք, լուծենք այս խնդիրը ու շարժվենք առաջ, այնպիսի պետական և քաղաքական առողջ համակարգ ունենանք, որի արդյունքում այլևս երբևէ նման բաներ չեն լինի»։