«Ժողովուրդ». ՀՔԾ պետ Սասուն Խաչատրյանը, հնարավոր է, պաշտոնանկ արվի
«Ժողովուրդ» թերթը գրում է.
«Արդարադատության առաջին դասի խորհրդական Ս. Խաչատրյանը պատահական մարդ չէ համակարգում. նա ՀՀ վճռաբեկ դատարանի քրեական և զինվորական գործերով պալատի նախկին նախագահ, Արաբկիրի դատարանի նախկին նախագահ, դասախոս, այժմ թոշակի անցած Մհեր Խաչատրյանի որդին է: Ծնվել է Երևանում, ավարտել ԵՊՀ իրավագիտության ֆակուլտետը, ուսանել է ՀՀ ՆԳՆ բարձրագույն դպրոցի ասպիրանտուրայում, դասավանդել նույն ԲՈՒՀ-ում: Որդի Խաչատրյանն իր կարիերան սկսել և /մինչև ՀՔԾ պետ նշանակվելը/ ավարտել է դատախազությունում, և ինչպես նրան բնորոշում են մտերիմները, ուղն ու ծուծով դատախազ է: Համակարգում աշխատանքի է անցել դեռևս նախկին նախագահ Քոչարյանի օրոք՝ 2000 թ. մայիսից, որպես Շենգավիթ համայնքի դատախազության քննիչ, եղել է նաև Երևան քաղաքի դատախազության ավագ դատախազ, Շենգավիթի դատախազի տեղակալ, Երևան քաղաքի դատախազի՝ Հրաչյա Բադալյանի տեղակալը, Արաբկիր և Քանաքեռ Զեյթուն, հետո Մալաթիա-Սեբաստիա վարչական շրջանների դատախազը:
Խաչատրյանի դատախազական սրընթաց կարիերան կտրուկ ընդհատվեց 2016-ին՝ նախկին գլխավոր դատախազ Գևորգ Կոստանյանի օրոք, երբ դատախազությունում կադրային աննախադեպ ջարդ ու «զտումներ» սկսեցին, երբ հիմնականում համակարգից հեռացվում էին նախորդի` Աղվան Հովսեփյանի կադրերը: Իր դիմումի համաձայն` «կոռուպցիայի դեմ պայքարի» անվան տակ պաշտոնից հրաժարված մի քանի տասնյակ դատախազներից մեկն էլ Ս. Խաչատրյանն էր: Դատախազի աշխատանքին հրաժեշտ տալուց հետո Խաչատրյանը կարճ ժամանակով ղեկավարեց հոր հիմնած «Մհեր Խաչատրյան և ընկերներ» իրավաբանական գրասենյակը, իսկ այնուհետ, երբ գլխավոր դատախազ նշանակվեց Արթուր Դավթյանը, ստանձնեց ՀՀ դատախազության` հատկապես կարևոր գործերի քննության նկատմամբ հսկողության վարչության պետի տեղակալի պաշտոնը: Այս պաշտոնից էլ նա 2018 թ. հունիսի 11-ից անցում կատարեց ՀՔԾ և մինչ օրս, ինչպես հատուկ նշված է ՀՔԾ կայքում, հիշյալ պաշտոնում է: Ի դեպ, երբ Խաչատրյանը նշանակվեց ՀՔԾ պետ, ֆեյսբուքում աղմկահարույց գրառմամբ հանդես եկավ Կոստանյանի նախկին տեղակալ Արմեն Դանիելյանն ու «արդարության վերականգնում» համարեց նախկին գլխավոր դատախազից «տուժած» Խաչատրյանին ՀՔԾ պետի պաշտոնում նշանակելը:
Մամուլում և սոցցանցերում, սակայն, որոշ շահագրգիռ խմբեր խոսում են ՀՔԾ պետի մոտալուտ պաշտոնանկության մասին, իբրև թե «փնթի է աշխատում», մեղադրանքներում առկա են անհասկանալի ձևակերպումներ, խախտում է քրգործերի հետ կապված օրենքով սահմանված որոշ ընթացակարգեր, որոնք վիճարկման առիթ են դառնում և այլն»:
Մանրամասները՝ թերթի այսօրվա համարում