«Լևոն Տեր-Պետրոսյանն ասաց՝ դա իմ ժողովուրդը չէ»․ Փոստանջյանը՝ Մարտի 1-ի դեպքերից մանրամասներ է հայտնել (տեսանյութ)
Մարտի 1-ին պետք է տրվի և՛ քաղաքական, և՛ իրավական գնահատական, այս պահին մենք չունենք ո՛չ մեկը, ո՛չ էլ մյուսը։
Այս մասին լրագրողների հետ հանդիպմանն ասաց «Երկիր Ծիրանի» կուսակցության նախագահ Զարուհի Փոստանջյանը՝ անդրադառնալով Մարտի 1-ին կայանալիք երթին։
Զարուհի Փոստանջյանի գնահատմամբ՝ երթն ինքնանպատակ է, քանի որ միայն Միասնիկյանի արձանի մոտ գնալ կամ մոմավառություն անել, անիմաստ է։ Նրա խոսքով՝ եթե ցանկություն կա հարգելու Մարտի 1-ի զոհերի հիշատակը, ապա ավելի նպատակահարմար է հուշարձան կառուցել նրանց համար, և նաև նոր սերնդին ներկայացվի, թե ինչ է եղել այդ օրը Երևանի փողոցներում։
Իսկ այս դեպքում, ըստ Զարուհի Փոստանջյանի, մեր ազգի ողբերգությունն օգտագործվում է քաղաքական նպատակների համար։
«Մենք դա ենք հիմա տեսնում։ Այդ միջոցառումները սպասարկում են նեղ քաղաքական նպատակներ՝ նեղ խմբակի կողմից»,- ասաց Զարուհի Փոստանջյանը։
Նա նկատում է, որ կառավարության ղեկավար Նիկոլ Փաշինյանը խոստացավ, իսկ ավելի ուշ, արդեն հրապարակում «բղավեց», թե Մարտի 1-ը բացահայտված է, սակայն, Փաստանջյանը ցավով է նկատում, որ դա միայն Փաշինյանի ցանկությունն է, իսկ նրա կողմից արված հայտարարությունը կեղծիք է։
«Ցավում եմ, որ լուրջ գործով զբաղվելու փոխարեն մեզ նորից փորձում են շեղել իրական խնդիրներից։ Ու եթե խոսում ենք Մարտի 1-ից, ապա պետք է այդ գործում ներգրավել նաև առաջին նախագահ Լևոն Տեր-Պետրոսյանին, քանի որ նա ևս մասնակից է եղել ծրագրին, այն ծրագրին, ըստ որի՝ նախատեսվել են նաև զոհեր»,- ասում է Փաստանջյանն ու հիշեցնում 2008 թվականին՝ հունվարի 22-ին, բազմամարդ հավաքի ժամանակ Լևոն Տեր-Պետրոսյանի ելույթը, որի ժամանակ նա շեղվելով իր տեքստից, արտասանել է Չարենցի «Մահվան տեսիլը»։
Զարուհի Փոստանջյանը նկատում է, որ Լևոն Տեր-Պետրոսյանի խնդիրն իշխանափոխությունը չէր, քանի որ երբ նրան ընձեռվել էր այդ պահը, նա ժողովրդին տուն է ուղարկել։
Փոստանջյանը հիշում է, թե ինչպես է արձագանքել Լևոն Տեր-Պետրոսյանն իրենց առաջարկին, երբ նրանք ցանկացել են ապահովել նրա անվտանգ տեղաշարժը։
«Նա չասաց, որ ինքն անվտանգության կամ տեղաշարժի հետ կապված խնդիր ունի, նա բարձրացրեց ձեռքը ու մատը թափ թալով ասաց՝ դա ինքնաբուխ հավաք է, մեր շտաբն այս պահին չի գործում, մեր շտաբն իմ տանից դուրս գալու մասին այս պահին չի խոսել, և դա էլ իմ ժողովուրդը չէ»,-ասաց Զարուհի Փոստանջյանը։
Նրա խոսքով՝ Մարտի 1-ի առավոտյան արդեն, ըստ ծրագրի առաջին զոհն էր լինելու, և դա լինելու էր ոստիկան, ում Արմեն Մարտիրոսյանը, սակայն իր մարմնով պահեց, և այդ զոհը չստացվեց։
Մանրամասները՝ տեսանյութում