Լուրջ վերաբերեք Ձեր կարգավիճակին. Գևորգ Պետրոսյանը՝ Արայիկ Հարությունյանին (տեսանյութ)
Ազգային ժողովի «Բարգավաճ Հայաստան» խմբակցության պատգամավոր Գևորգ Պետրոսյանը ֆեյսբուքյան իր էջում կիսվել է Կրթության և գիտության նախարար Արայիկ Հարությունյանի ֆեյսբուքյան լայվով և կից գրել.
«Ահա, թե ինչով է զբաղված Կրթության և գիտության նախարարը
Եթե նախարարին դեմքով չճանաչեի, այս տեսանյութը դիտելիս կկարծեի, թե Շամշյանն իրեն ժամանակավոր փոխարինող է կարգել՝ «Սուրանկյուն» հաղորդաշարը շարունակելու համար։
Պարոն նախարար, հո չե՞ք մոռացել, թե ինչ եք աշխատում։
Մի՞թե Ձեր աշխատասենյակում հանրության կողմից ոչ միանշանակ ընդունվող Կարաբինային հավուր պատշաճի ընդունելուց հետո երկրորդ ամենակարևոր գործը լայվ մտնելն ու աշխատանքային ժամերին հետաքննություն վարելն է։
Բա կրթության ու գիտության հարցերը...
Էն, որ ճիշտ չեք արտաբերում Ձեր ղեկավարած ոլորտը կարգավորող օրենքի անվանումը, դա մի կողմ (մի առիթով վերջերս ասել էիք, որ անգիր անել չեք սիրում)...
Էն, որ կրթության և գիտության նախարարին չեն պատշաճում այնպիսի արտահայտություններ, ինչպիսիք են, օրինակ՝ «կարողանա գլխավորի», «մի հետաքրքիր բան ունեմ ձեզ ցույց տալու» և այլն, դա էլ մի կողմ...
Բայց մի՞թե լայվ մտնելն ու նախկիններին քննադատելն է Ձեր գործը։
Դպրոցներում դասավանդման խնդիրները, դասագրքերի որակը, դասարանային հագեցվածությունը, աշխատանքի պայմանները, հանրակրթական հաստատություններից որակյալ կադրերի արտահոսքը, մանկավարժների հացի խնդիրը, բուհերի լսարանային պայմանները, գյուղական համայնքներում դպրոցների անմխիթար վիճակը, դասախոսների ցածր աշխատավարձերը... Ո՞ր մեկն ասեմ...
Լուրջ վերաբերեք Ձեր կարգավիճակին։ Մի նսեմացրեք մեր իրավապահներին։ Թողեք իրենք զբաղվեն չարաշահումներով ու դրանց մեղավորներով։ Լայվ մտնելով նախարարություն չեն ղեկավարում, պարոն նախարար...
Խնդրում եմ ծ՝ ֆեյքերով չգրոհեք, չեմ արձագանքելու...
Պատասխան էլ չեմ պահանջում։ Ընդամենը հորդորում եմ զբաղվել բուն գործով...»,- գրել է պատգամավորը:
Իսկ ավելի վաղ իր լայվին կից Կրթության և գիտության նախարարը գրել էր.
«Ուղիղ մեկ տարի առաջվա կեղծողներն այսօր ԵՊՀ են պաշտպանում ։)
Ուղիղ մեկ տարի առաջ ճիշտ այս օրը ԵՊՀ-ում տեղի էին ունենում կեղծիքներ, ու ակադեմիական ազատությունների և բուհական ինքնավարության նորօրյա ռահվիրաները սուսուփուս, բերանները ջուր առած հետևում էին այդ կեղծիքին։ Ախր, ամեն ինչ արձանագրված է, մի՛ խոսեք, ինչ խոսում եք, օգտագործվում է ձեր դեմ»։
Ներկայացնում ենք նաև նախարարի ուղիղ եթերի տեսանյութը.