Իսկ Արարատ Միրզոյանը Լենինի դամբարանի առաջ մոմ չի՞ վառելու
ԱԺ նախագահի՝ Արարատ Միրզոյանի գլխավորած պատվիրակությունը մեկնում է Մոսկվա։ Պատվիրակության կազմում են ՀՀ ԱԺ նախագահի տեղակալ Ալեն Սիմոնյանը, ՀՀ ԱԺ պատգամավորներ Ռուբեն Ռուբինյանը, Միքայել Մելքումյանը, Վլադիմիր Վարդանյանը, Լիլիթ Մակունցը, Էդմոն Մարուքյանը, Արման Աբովյանը և Անուշ Բեղլոյանը:
Սա աղքատության փիլիսոփայությունն իր գլխից դուրս մղած, արարողակարգը ճոխության հետ խառնած, Արարատ Միրզոյանի՝ որպես ԱԺ նախագահի, առաջին այցն է Մոսկվա։ Նրան, ինչպես նաև պատվիրակության անդամների մեծամասնությանը, ռուսամետ գործիչներ չես համարի, ԲՀԿ-ականներին հանած, իհարկե, որոնք, ըստ ամենայնի, դիրքավորվելու են Հայաստանում որպես ռուսամետ ուժ։ Դեռ իշխանափոխության առաջին շաբաթներին, երբ հայ-ռուսական հարաբերություններում սկսեցին ի հայտ գալ սև ամպեր, ռուսական մամուլում լույս տեսած հրապարակումներում այս անունները շրջանառվում էին որպես սորոսականներ և արևմտամետներ։
Ու հիմա մի փոքր զարմանալի է, որ ժամանակին ԱՄՆ-ում իր անգին Գոհար կնոջ հետ վոյաժներ արած, Պոմպեոյի և Փենսի բարի ժպիտը «մուրացած», բայց այդպես էլ չարժանացած Արարատ Միրզոյանը որոշել է փոխել ուղղությունն ու իր առագաստները պարզել է դեպի հյուսիս՝ Ռուսաստան։ Հետաքրքրական կլիներ իմանալ, թե նավապետ Գոհարն Արարատի նավի առագաստների ուղղության այս փոփոխության հետ որևէ կապ ունի, թե ոչ։ Բայց դա չէ կարևորը։ Կարևորն այն է, որ երեկվա արևմտամետներն այսօր գնում են Մոսկվա՝ ըստ ամենայնի հպատակություն հայտնելու «Մոսկովի մեծ ցարին»։
Բնական երևույթ է անկեղծ ասած։ Ժամանակին ռուսներին ադապտացվելու խորհուրդ տված, իսկ հետո ռուսական սրնգի տակ պարելուն լիովին ադապտացած Նիկոլի հավատարիմ թիմակիցները պետք է գնային ու հպատակություն հայտնեին Մոսկվային։ Չէ՞ որ Նիկոլն ինքն էլ հասկացել է, որ իր իշխանության հարատևության պահպանման բոլոր ուղիներն անցնում են Մոսկվայով, Կրեմլով։
Հետևաբար չպետք է զարմանալ, որ Արարատ Միրզոյանի պատվիրակությունը նույնիսկ մոմավառություն կազմակերպի Լենինի դամբարանի մոտ։ Չէ՞ որ Նիկոլն իր հոգու խորքում երազում է լինել Լենինի նման համաշխարհային հեղափոխության լիդեր։ Փարիզում բաժակաճառերից մեկի ժամանակ նա նույնիսկ բերանից թռցրել էր այդ մասին, որ հեղափոխությունը Երևանից պետք է տարածվի ամբողջ աշխարհով։ Ու երևի ինքն էլ մտածում է, որ մի օր ապագայում Հանրապետության հրապարակում նաև իր դամբարանն են կառուցելու և իրեն են մումիֆիկացնելու իր զոմբիները, եթե իհարկե այդքան երկար կարողանան ժողովրդի ականջներից մակարոններ կախելով շարունակել մնալ իշխանության ղեկին։