Փաշինյան-Տեր-Պետրոսյան համագործակցության առաջին ծիծեռնակը
Հող հանձնելու վախն այնքան է խորացել Լևոն Տեր-Պետրոսյանի քաղաքական վերջին ակտիվացման փուլում, որ Ազատության հրապարակում հանրահավաք անցկացնելու առիթ է տվել հայաստանյան որոշ շրջանակների համար։
Հայկական արժեքների պահպանության ԿԱՄՔ հասարակական նախաձեռնության անդամները փետրվարի 26–ին՝ ժամը 18.00-ին, հանրահավաք են անցկացնելու Ազատության հրապարակում` «Հայրենիքից հող չունենք հանձնելու» կարգախոսով։
Այս մասին այսօր լրագրողների հետ հանդիպմանը հայտարարել է ԿԱՄՔ հասարակական նախաձեռնության համակարգող խորհրդի անդամ Վահանգն Չախալյանը։
«Հակված չենք մտածելու, որ հայրենի իշխանությունները հանուն ինքնանպատակ խաղաղության՝ կարող են գնալ ապազգային քայլերի՝ հակառակորդի հետ հնարավոր զիջումներ ու փոխզիջումներ բանակցելով, մյուս կողմից՝ հանրահավաքը դիտարկում ենք այս հարցում լրացուցիչ աջակցություն վարչապետին, բանակցային գործընթացում ազգային և պետական շահերի վստահաբար առաջմղման տեսանկյունից»,–ասել է Չախալյանը։
Փաստորեն, հասարակական որոշ շրջանակներ ունեն լրջագույն մտահոգություն, որ Փաշինյանը գուցե Արցախի հարցում չկարողանա վստահաբար առաջ տանել Հայաստանի ազգային շահը, ինչի պատճառով արդեն հասարակական որոշ խմբեր են իրենց աջակցությունը հայտնում վարչապետին։
Իրականում պետք է լիներ հակառակը՝ հասարակությունը պետք է իր երկրի ղեկավարով այնքան ապահովված և անվտանգ զգար․․․
Ցավոք․․․ իրականությունն այլ է։
Արցախի հարցում մեր թիկունքն ապահով չէ ու դրա պատճառը Փաշինյանի՝ ես չեմ կարող Արցախի ժոովրդի անունից բանակցել, որովհետև նրանք ինձ չեն ընտրել հայտնի արտահայտությունն ու բանակցային գործընթացը թաղելն է․ 2018 թվականի մայիս ամսից այս կողմ մենք Արցախի բանակցային գործընթացում որևէ դրական տեղաշարժ չունենք, եթե չասենք՝ նահանջ։
Արդյոք Ազատության հրապարակում «Հայրենիքից հող չունենք հանձնելու» կարգախոսով հանրահավաքի ժամանակ մենք կտեսնե՞նք նոր Հայաստանի նոր իշխանությունների ներկայացուցիչներին, թե՞ նրանք զրկված կլինեն այդ քայլն անելու իրենց իրավունքից, ցույց կտա փետրվարի 26-ը։