Մնացականյանին Վաշինգտոնում մերժել են. էլ ինչ սպասել

Այսօր հայտնի դարձավ, որ Միացյալ Նահանգները չեղյալ է հայտարարել ՀՀ ԱԳ նախարար Զոհրաբ Մնացականյանի նախատեսվող այցը ԱՄՆ։ Իհարկե, շատ խելք պետք չէ հասկանալու համար, որ այդ չեղարկման հիմքում Սիրիա զորախումբ ուղարկելն է, այլ կերպ ասած՝ Նիկոլի սիրիական արկածախնդրությունը։

Ըստ ամենայնի, սա դեռ առաջին քայլն է, գործնական հարթության վրա, որ անում է Միացյալ Նահանգներն ի պատասխան Երևանի ռուսահաճ կեցվածքի, որը մեղմ ասած՝ նույնիսկ Կրեմլում չգնահատվեց: Նախ Մյունխենում, ըստ շրջանառվող լուրերի, Լավրով-Մնացականյան հանդիպման ժամանակ Լավրովը Կրեմլի ամենախիստ դժգոհությունն է փոխանցել Երևանին՝ կապված հեղափոխական սեմինարների հետ, ինչն ուղղակի իմաստով նշանակում է, եթե սրան էլ գումարենք ռուսական մեդիայի արշավն ընդդեմ Նիկոլական Հայաստանի, որ Մոսկվայում պարզապես «ջրված են համարում» զորախմբի դիմաց իրենց երախտագիտություն ունենալու հարցը։

Ստացվում է, որ արվել է մի քայլ, որը ոչ մի օգուտ չի բերել Հայաստանին, իսկ թե ինչքան վնաս կբերի, դեռ հայտնի չէ։

ԱՄՆ-ն իր «զինանոցում», ընդդեմ Երևանի, ունի էլի բավականին շատ «զինատեսակներ», որոնք կարող է կիրառել։ Նախ՝ անկախ լոբբիստական աշխատանքից, Թրամփը կարող է պարզապես հետին պլան մղել Հայոց ցեղասպանության ճանաչման հետ կապված ցանկացած հարց։ Ավելին՝ Թրամփը թվիթերյան իր մեկ գրառումով կարող է պարզապես Երևանին դնել այն պետությունների շարքում, որոնք գործակցում են Ասադի ռեժիմի հետ, իսկ դրա հետևանքները հասկանալի է, թե ինչպիսին կարող են լինել։

Եվ վերջապես, Միացյալ Նահանգները կարող է հանել կամ շրջանցել հայտնի 904-րդ արգելքը և ազատ զենք վաճառել Ադրբեջանին։

NEWSPRESS.am