ԱՄՆ-ն առաջին դեղին քարտը ցույց տվեց Փաշինյանին
Սիրիա զորախումբ ուղարկելիս Նիկոլ Փաշինյանը թերեւս չէր էլ մտածել, որ հարցը կարող է այս աստիճան ծավալվել ու բանն այնտեղ հասնի, որ Միացյալ Նահանգները դեռեւս դիպլոմատիկ բառապաշարով, սակայն բավական կոշտ տեքստով արձագանքեր այդ քայլին, որն այս դեպքում այլ անուն տալ, քան հանուն իշխանության պահպանման արկածախնդրության գնալ՝ հնարավոր չէ։ Իսկ ԱՄՆ Պետդեպարտամենտն, անդրադառնալով Հայաստանից մասնագետների 83 հոգանոց խմբի գործուղմանը Սիրիա՝ ընդգծել է, որ չի պաշտպանում Սիրիայի զինված ուժերի հետ ներգրավվածությունը, ինչպես նաև Հայաստանի և Ռուսաստանի միջև համագործակցությունն այս առաքելության նպատակով:
«Մեզ հասկանալի է Սիրիայի մարդասիրական իրավիճակին արձագանքելու այլ պետությունների ցանկությունը, և մենք կիսում ենք Մերձավոր Արևելքում կրոնական փոքրամասնությունների պաշտպանության շուրջ մտահոգությունները»,-ասված է Պետդեպարտամենտի` լրատվամիջոցների հարցումներին տրված պատասխանում, որը տրամադրել են Հայաստանում ԱՄՆ դեսպանատնից: «Այնուհանդերձ, մենք չենք պաշտպանում Սիրիայի զինված ուժերի հետ ներգրավվածությունը՝ լինի քաղաքացիական անձանց օգնություն ցուցաբերելու նպատակով, թե ռազմական ուղղվածության: Մենք նաև չենք պաշտպանում Հայաստանի և Ռուսաստանի միջև համագործակցությունն այս առաքելության նպատակով»:
Ապա արդեն Պետդեպարտամենտի արձագանքում պարզաբանվում է, որ
ՌԴ-ն գործակցել է Ասադի ռեժիմի հետ՝ կոտորածի ենթարկելով քաղաքացիական անձանց և պատճառ դառնալով մարդասիրական աղետի: Բացի այդ, ԱՄՆ-ն ֆիքսել է, որ Ռուսաստանը շարունակում է գլոբալ հարթակում հանդես գալ Ասադի ռեժիմի և վերջինիս վայրագությունների պաշտպանության դիրքերից։
Եթե զուտ ռեալ-քաղաքականության դիրքերից նայենք, ապա արձագանքը բավական արագ էր, եւ գնահատականն էլ՝ խիստ որոշակի։ Պարզ է, որ Միացյալ Նահանգները որոշակի նախազգուշացում արեց արդեն եւ գնդակը նետեց Երեւանի դաշտ։ Հետագայում արդեն, ըստ այն հանգամանքի, թե Երեւանը ինչպես կհասկանա արձագանքն ու ինչ քայլեր կձեռնարկի, կպայմանավորվեն ԱՄՆ հաջորդ գործողությունները։ Երեւանն, ի դեպ, գոնե վերջին ամիսներին, առանձնապես նրբանկատությամբ ու դիպլոմատիզմով աչքի չի ընկել։
Իհարկե, պաշտոնական Երեւանը հանդես եկավ ինչ-որ լղոզված մեկնաբանությամբ, սակայն Փաշինյանը հասկացել է կարծես թե, որ ամերիկյան կողմի զայրույթն է հարուցել եւ ակամա խցկվել իրեն բացարձակապես չվերաբերվող գեոպոլիտիկ խնդրի մեջ, որտեղ կարող է պարզապես «խուրդվել-գնալ» սովորական մանրադրամի նման, եթե ժամանակին չկարողանա զսպել ինքն իրեն ու կանգ առնել։