«Մեր ձեռքին նոր փաստաթղթեր կան». «Նորաշեն 2007»-ից տուժած բնակիչները դարձյալ ակցիա են կազմակերպել (տեսանյութ)
«Նորաշեն 2007» կոոպերատիվից տուժած բնակիչները, ինչպես նախկին իշխանության ժամանակ, այսօր էլ դեռ շարունակում են պահանջել իրենց գնած բնակարանները կամ փոխհատուցում:
Խաբված բնակիչները Նիկոլ Փաշինյանի պաշտոնավարումից հետո հույս ունեին, որ իրենց հարցը կլուծվի: Ամեն անգամ՝ կառավարության նիստի օրերին, նրանք լինում էին կառավարության շենքի մոտ ու պահանջում իրենց հասանելիքը: Հեղափոխությունից հետո, տևական ժամանակ նրանք այլևս չէին լինում կառավարությունում և սպասում էին, մինչև իշխանությունը կայանա ու հերթը հասնի նաև իրենց հարցին:
Սակայն, NEWSPRESS.am-ի հետ զրույցում նրանք նկատեցին, որ այլևս սպասել չեն կարող:
Տուժած բնակիչներից Արուսյակ Վանյանը նկատեց, որ այսօր արդեն նոր փաստերով ու փաստաթղթերով են եկել կառավարություն և հետ չեն կանգնելու՝ մինչև իրենց բարձրացրած հարցը դրական լուծում չստանա:
Հիշեցնենք, որ Երևանի Գևորգ Չաուշի փողոցում բազմաբնակարան շենք կառուցելու նպատակով «Նորաշեն 2007» սպառողական կոոպերատիվի ղեկավարությունը դեռևս 2007 թվականին գումարներ էր հավաքել շենքում բնակարան գնելու ցանկություն ունեցող անձանցից: Շատերն անգամ վճարել են բնակարանի ամբողջ գումարը:
Հայտնվելով ֆինանսական ծանր վիճակում՝ կառուցապատողներն սկսել են բնակարանները գրավադրել և տոկոսով գումարներ վերցնել: Բնակարաններից 14-ը գրավադրվել է ԱԺ փոխնախագահ Հերմինե Նաղդալյանի ու նրա ամուսնու՝ Դավիթ Բեգլարյանի, իսկ մնացածը՝ տարբեր անձանց մոտ: Մինչև այսօր բնակարանների մի մասն ամուսինները չեն վերադարձնում, իսկ բնակարանների սկզբնական գնորդները մնացել են անօթևան:
Բնակիչները գործով դիմել են դատարան ու ընկել բյուրոկրատական քաշքշուկների մեջ: Թեև առկա են եղել փաստեր, որ իրենք վճարել են բնակարանների համար, սակայն դատական գործընթացը մինչ օրս շարունակվում է՝ ո՛չ հօգուտ իրենց:
Մանրամասները՝ տեսանյութում