Սփյուռքի նախարարի պաշտոնակատարի ոգևորությունը կեղծ օրակարգից` անհասկանալի է
Մազից կախված և փակման վտանգի առաջ կանգնած Սփյուռքի նախարարությունը որոշել է հարմար առիթն օգտագործել ու ծավալվող սոցցանցային քննարկումների ալիքի վրա փորձել դուր գալ Փաշինյանին։
Նախարարի պաշտոնակատար Բաբկեն Տեր-Գրիգորյանն իր ֆեյսբուքյան էջում գրել է, որ նախարարությունը օրհներգի փոփոխության վերաբերյալ կարծիքներ է հավաքելու Սփյուռքի բոլոր համայնքներից և խնդրել է դրսի ապրող մեր հայրենակիցներին՝ իրենց առաջարկություններն ու կարծիքներն ուղարկել գրառման մեջ նշված էլփոստի հասցեով։
Այն, որ օրհներգի փոփոխության հարցն առհասարակ կեղծ օրակարգ է, պարզ է ինքնին։ Քաղաքագիտություն և քաղաքական տեխնոլոգիաներ իմացող ցանկացած մեկը կարող է վկայել, որ երբեմն-երբեմն իշխանությունները գնում են նման քայլի՝ օրակարգ են նետում երկրորդական, երրորդական հարցեր, որոնք, սակայն, ունեն բարձր հուզականություն, և սկսում հանրային կարծիքի խառնարանում «ռասկրուտկա» անել՝ մարդկանց ուշադրությունը հիմնական խնդիրներից շեղելու համար։
Կան դեպքեր էլ, որ նման «արտանետումներ» արվում են՝ որևէ հարցի հետ կապված՝ ընդհանուր հանրային տրամադրությունները ստուգելու համար։ Օրինակ, երբ Հ1-ը ոգևորված ներկայացնում էր հայ-ադրբեջանական քիրվայության հեռանկարը, սա կարելի է համարել որպես տրամադրություններ շոշոափող գործողություն, իսկ ահա օրհներգի փոփոխության հարցը՝ ուշադրությունը շեղող ակցիա։
Այս ամենը նկատի ունենալով, իրարկե, անհասկանալի է պետության գործունեության մի ամբողջ ոլորտ համակարգող նախարարության ոգևորությունը, որն ակամա մատնում է նաև այն, որ Սփյուռքի նախարարությունում պատկերացում ունեն սփյուռքից այնքան, որքան սփյուռքի նախկին նախարար Հրանուշ Հակոբյանի հետ լուսանկարված ինքնակոչ հրաշամանուկ տիեզերագնացը՝ աստղագիտությունից: