«Ուսուցչի վարքականոնը» մշակվել է, որ մեր ուսուցիչները բավականին պաշտպանված լինեն». Արայիկ Հարությունյան
Երբ 2008 թվականին ներդրվեց ավագ դպրոցների համակարգը, դրանք անտեսվել են և վատ ծրագրեր են տվել, ինչի արդյունքում ավագ դպրոցի գործակիցն ու գումարները նվազել են:
Այդ մասին լրագրողների հետ զրույցում ասաց ԿԳ նախարար Արայիկ Հարությունյանը: Նրա գնահատմամբ՝ անտեսվել են ավագ դպրոցների ծրագրերը և բովանդակային առումով տուժել են: Բացի այդ, ավագ դպրոցի հաշվին գումարներ են տնտեսվել և խնդիրներ են առաջացել:
«Անցած տարի ավագ դպրոցների հաշվին փորձել են գումար խնայել, և դրանց գործակիցը նվազել է, գումարները նվազել են և տնօրեններն իրենց խնայողությունների, մեր կողմից տրամադրված 350 միլիոն դրամի հաշվին կարողացել ենք այնպես անել, որ աշխատավարձերը չիջնեն: Հիմա տնօրեններն ասում են, որ չեն կարող երկու տարի առաջ հաստատված կարգով ֆինանսավորման դեպքում չիջեցնել աշխատավարձերը, և հիմա տնօրենների հետ քննարկում ենք, որ հասկանանք, թե որքան է այդ ֆինանսավորումը կազմելու»,-ասաց նախարարը՝ հավելելով, որ նախարարությունը պետք է 1 մլրդ դրամ տրամադրի ավագ դպրոցներին, որպեսզի ուսուցիչների աշխատավարձը չիջնի:
Նախատեսվում են նաև սեպտեմբերին պայմանագրեր կնքել բոլոր ծնողների հետ: Արայիկ Հարությունյանի որակմամբ՝ «ավելորդ աղմուկ» բարձրացավ «Ուսուցչի վարքականոն»-ի հանրային քննարկման շրջանակում, և հիմա նախարարությունը նախատեսում է փոփոխություններ կատարել այս փաստաթղթում: Հարությունյանի խոսքով` այժմ արդեն ուսուցիչներին տրվող էթիկայի կանոնները, ինչպես նաև` դպրոցի ու ծնողների միջև կնքվող պայմանագրերը շատ հստակ այդ իրավունքներն ու պարտականությունները կսահմանազատեն, և «մեր ուսուցիչները բավականին պաշտպանված կլինեն»: