«Բանակցել ո՛չ հայանպաստ հարցերի շուրջ, որևէ մեկին թույլ չի տրվելու»․ Վիտալի Բալասանյան
Երբ խոսում են բանակցությունների մասին՝ դա պաշտոնական փաստաթղթի շուրջ է լինում, իսկ այսօր բանավոր են այդ մասին խոսում։ Լրագրողների հետ զրույցում իր տեսակետը հայտնեց բանակի տոնի առթիվ «Եռաբլուր» այցելած Արցախի անվտանգության խորհրդի քարտուղար Վիտալի Բալասանյանը։
Բոլոր նրանց, ովքեր խոսում են, թե ժողովուրդներին պետք է պատրաստել խաղաղության, Բալասանյանը կոչ է անում հասկանալ, որ նախ պետք է կնքվի տարածաշրջանում խաղաղության պայմանագիր։
«Ինչի՞ մասին է խոսքը՝ ժողովուրդներին խաղաղության նախապատրաստել, եթե կլինի կնքված պայմանագիր։ Ես չեմ հասկանում ու հիմա հարց եմ տալիս՝ ժողովուրդ, դուք պատրա՞ստ եք խաղաղության։ Այսինք՝ պետք է այդ ֆորմատն ունենանք, համապատասխան փաստաթուղթ ունենանք։ Մենք կռվարար ժողովուրդ չենք, մենք պարտադրված ենք մտել պատերազմի մեջ»,-ընդգծեց Վիտալի Բալասանյանը՝ կրկին հայտարարելով, որ անհրաժեշտ է նախ փաստաթուղթ ունենալ։
Նրա դիտարկմամբ՝ Արցախի հարցը լուծվելու է համայն հայության և մեր ժողովրդի ուժերով։ Սակայն նորից նկատեց, որ բանավոր բանակցություններ չպետք է լինեն։
Լրագրողի դիտարկմանը՝ թե խոսվում է կարգավիճակի դիմաց որոշակի տարածքի մասին, Վիտալի Բալասանյանը պատսախանեց միանշանակ՝ ո՛չ, չի լինի։
«Ասում եմ ո՛չ․ դա չի նշանակում, որ տարածքի հարց չեն բարձրացնի, բայց անելու ենք ամեն ինչ, ինչպես մինչ օրս արել եք, որ տարածքի հարց չբարձրացնեն»,-ասում է Բալասյանյանը։
Նա նկատում է, որ երբեք մենք թույլ չենք եղել, ինչպես դա հայտարարվում է։
Պատասխանելով հարցին, թե ի՞նչ հարցեր են քննարկել Հայաստանի վարչապետ Նիկոլ Փաշինյանն ու Ադրբեջանի նախագահ Իլհամ Ալիևը, Բալասանյանը պատասխանեց, որ որևէ մեկն իրավունք չունի, անկախ այն բանից, թե ով է նա, բանակցել, խոսել Արցախի Հանրապետության պետականության, ամրագրված սահմանադրության և մնացած օրենքներով։
«Կարող են միջնորդել, կարող են երաշխավորել, բայց բանակցել ո՛չ հայանպաստ հարցերի շուրջ, որևէ մեկին թույլ չի տրվելու», - ընդգծեց նա՝ հավելելով, որ հնարավորություն է տեսնում նաև Արցախը բանակցային սեղան վերադարձնելու։