Միլիոններ մսխող «գազավիկն» ապօրինի տարածքներ է զավթել. հաղորդում ՀՀ ոստիկանությանն ու դատախազությանը
Միլիոնատեր «գազավիկների» մասին NEWSPRESS.am-ն արդեն անդրադարձ կատարել է «Հայտնի գազավիկը մսխում է ժողովրդից «քերած» միլիոնները» վերտառությամբ հոդվածում: Մենք անդրադարձել էինք «Գազպրոմ Արմենիա» ընկերության Արարատի մասնաճյուղի տնօրեն Էդգար Ավոյանի ունեցվածքին, կապերին և դրսևորած վարքագծին:
Փաստերով ներկայացրել էինք, թե Ավոյանն ինչպես է կարողացել պապական եկած ժառանգությունն օր օրի ծաղկեցնել և հարստանալ:
Հրապարակված տեղեկությունների աղբյուրը մեզ նաև այլ՝ շատ ուշագրավ մի տեղեկություն տրամադրեց: Բանն այն է, որ Մասիսի տարբեր քաղաքապետեր հարևանցիորեն են անցել Ավոյանի անօրինական զավթումների կողքով և ամեն կերպ փորձել են աչք փակել դրանց վրա:
Մասնավորապես՝ Մասիս քաղաքի Հերացու փողոցի 5/10 հասցեում ժամանակին շինություն է կառուցել, որի մի մասն ապօրինի կերպով կառուցվել է հարակից մանկապարտեզին պատկանող տարածքի վրա, բայց քանի որ տեղանքը դուր է եկել Ավոյանին, նա տարածքը զավթել է և ապօրինի շինարարություն իրականացրել: Ի դեպ, այս մասին մեր հարցմանը Մասիսի քաղաքապետարանն այդպես էլ չի պատասխանել՝ մատնանշելով, որ հարցումը պատշաճ ձևակերպած չի եղել:
Այս տեղեկությունը կարող են Դատախազությունը, Ոստիկանությունը կամ այլ պատկան մարմիններ ուշադրության տակ առնել և պետական միջամտությամբ երեխաների համար սահմանված տարածքը նորից վերադարձնել մեր երեխաներին:
Հակառակ դեպքում՝ ստացվում է՝ մարդն իրավունք ունի, որտեղ ցանկանա, իր սեփական կառուցապատումն իրականացնել և պատասխանատվության չենթարկվել: Դե իսկ հիմնական պատճառն այն է, որ այս մարդը բավականին ամուր հենարան ունի, որի մասին արդեն գրել էինք:
Նախորդ հրապարակումից մեջբերումը՝ առանց խմբագրման.
«Նա իր պաշտոնը ստացել է վարչապետ Հովիկ Աբրահամյանի կառավարման շրջանում, գործել է նրա հովանու ներքո, նաև թիվ 5 ընտրատարածքից պատգամավոր ընտրված ՀՀԿ-ական Մուրադ Մուրադյանի սանիկն է: Նախորդ ընտրություններին սատարում էր Ավշարի Արայիկին, իսկ այժմ, ինչքան էլ զարմանալի թվա՝ ՔՊ-ի կողքին է»: