Փաստաբանները, հաշվապահները ծառայությունների գները կբարձրացնեն․ հարկատեսակ է փոխվում
Դեռևս լուռ, բայց պայթունավտանգ խռովություն է առաջանում հաշվապահների, խորհրդատուների, փաստաբանների շրջանում։ Խնդիրը «Հայաստանի Հանրապետության հարկային օրենսգրքում փոփոխություններ և լրացումներ կատարելու մասին» ՀՀ օրենքի նախագիծն է, որում հանրային քննարկումներից հետո փոփոխություններ են առաջացել և այս մասնագետները պետք է ոչ թե շարունակեն աշխատել շրջանառության հարկով, այլ ԱԱՀ-ով։
Նկատենք, որ մինչև այս, հանրային քննարկման դրված նախագծով այդ փոփոխությունը սահմանված չի եղել և կրկնվում է այն արատավոր պրակտիկան, երբ մի նախագիծ դրվում է քննարկման, մեկ այլ բան մտցվում կառավարության նիստի օրակարգ։
Օրենքի՝ նման տեսքով ընդունման պարագայում մեր երկրում կբարձրանան այդ ծառայությունների գները, և քանի որ հարկային բեռը մի քանի անգամ ավելանում է՝ կմեծանա նաև ստվերը։ Հաշվապահները, կամ փաստաբանները այլևս մի կողմ կդնեն օրինական դաշտում աշխատելու կանոնը և հաճախորդների հետ պարզապես բանավոր կպայմանավորվեն։ Հարկելու այս ոլորտը նույնչափ բարդ է, որչափ շոու բիզնեսի ոլորտը, որը ևս ՊԵկ նախագահը ցանկանում է հարկել։
Ի դեպ, այստեղ կա նաև մեկ այլ խնդիր. սա բավականին ձեռնտու նախագիծ է խոշորների համար, որոնցից մեկը՝ «Փի-Էյջ-Փի Փարթնըրզ» հաշվապահական-խորհրդատվական ընկերությունը համասեփականության իրավունքով պատկանում է ՊԵԿ նախագահ Դավիթ Անանյանին։
Մեզ տեղեկություններ են հասել այն մասին, որ այս օրերին ոլորտում գործող անձինք ինքնակազմակերպվում են և մեթոդներ մշակում, թե ինչպես պայքարի դուրս գան օրենքը նման կերպ ընդունելու դեմ։
NEWSPRESS.am