Այն, ինչ թույլատրելի չէր Սերժ Սարգսյանին, չի կարելի թույլատրելի լինի Նիկոլ Փաշինյանին
«Լուսավոր Հայաստան» խմբակցության քարտուղար Գևորգ Գորգիսյանն այն համոզմունքին է, որ ուժային կառույցները պետք է բերվեն խորհրդարանական վերահսկողության դաշտ:
Նա լրագրողների հետ հանդիպմանը նկատեց, որ ժամանակին ՀՀ երկրորդ նախագահ Ռոբերտ Քոչարյանն ուժային կառույցները տարավ իր ենթակայության տակ, հետո այն շարունակեց մնալ այդպես երրորդ նախագահ Սերժ Սարգսյանի օրոք, իսկ այժմ էլ փորձում են թողնել նախորդների սխալը նոր իշխանության ժամանակ, և այժմ Նիկոլ Փաշինյանի վերահսկողությանը հանձնել ուժային կառույցները։
«Բազմաթիվ առիթներ են եղել համոզվելու, որ խորհրդարանը չի կարողանա որևէ կերպ իրականացնել այդ կառույցների նկատմամբ վերահսկողություն, որովհետև չլինելով կառավարության անդամ՝ այդ կառույցների ղեկավարները պարտավոր չեն ներկայանալ խորհրդարան և պատասխանել հարցերի, հետևաբար՝ քաղաքական վերահսկողությունից դուրս են մնում, իսկ պատասխանատվությունն այդ դեպքում մնում է վարչապետի վրա»,-ասաց Գորգիսյանը։
Ճեպազրույցի մասնակից ԼՀ խմբակցության պատգամավոր Անի Սամսոնյանն էլ ընդգծեց, որ այն, ինչ թույլատրելի չէր ՀՀԿ-ին, չի կարող թույլատրելի լինել նաև «Իմ քայլի» համար։
«Այն, ինչ թույլատրելի չէր Սերժ Սարգսյանի համար, չի կարելի թույլատրելի լինի Նիկոլ Փաշինյանի համար, այսինքն՝ չպետք է մնա իշխող ուժի քաղաքական կամքի հույսին, պետք է լինեն ինստիտուտներ»,- հայտարարեց պատգամավորը։