«Տոտալ թալանն սկսվել է Սերժ Սարգսյանի օրոք՝ 10 տարի առաջ, ինչո՞ւ դրա մասին ոչ ոք չի խոսում»․ Գուրգեն Եղիազարյան
Երևանն ապացուցեց, որ զզվել էր այն իրավիճակից, ինչ ստեղծել էր Սերժ Սարգսյանի իշխանությունը՝ 10 տարվա ընթացքում. Հայաստանն ասաց՝ «ոչ»։
«Նոյյան տապանում» հրավիրված հաղորդման ժամանակ իր տեսակետը հայտնեց ԱԱԾ պետի նախկին տեղակալ, հրապարակախոս Գուրգեն Եղիազարյանը։ Միևնույն ժամանակ նա նշեց, որ այն, ինչ տեղի ունեցավ, ինքը հեղափոխություն չի համարում։
Գուրգեն Եղիազարյանի խոսքով՝ Երևանի քաղաքապետը, առանց հասկանալու, հասարակությանը բաժանեց սև-սպիտակի, ու յուրայիններն էլ նրան արդարացնելու համար, սկսեցին կրկնել այդ որակումը։
«Սև-սպիտակ չկա Հայաստանում։ Դուք պատկերացնո՞ւմ եք՝ հենց որ մենք, էս 29 հազար քառ կմ-ի վրա սկսեցինք բաժանել սևի ու սպիտակի՝ չոռը կգա մեզ կտանի ազգովի»,-նշեց Եղիազարյանը։
Նա նաև զարմանք հայտնեց, որ ինչո՞ւ են անընդհատ խոսում 20 տարվա մասին, երբ տոտալ թալանն սկսվել է Սերժ Սարգսյանի օրոք՝ 10 տարի առաջ, և Սերժ Սարգսյանը պետք է պատասխան տա իր կատարած թալանի համար։
«Հիմարություն կլինի, եթե հարցենմ՝ ինչո՞ւ Սերժ Սարգսյանին չեն բռնում։ Էսքան ժամանկ ո՞ւմ են բռնել՝ բռնեմ, հարցաքննեմ, փողը վերցնեմ, բաց թողնեմ․․․ դա չի հետաքրքրում ինձ։ Խնդիրն այն է, որ անընդհատ խոսում են 20-25 տարվա մասին, ինչո՞ւ, որ շեղեն այդ տասը տարվա թալանից»,-նկատեց Եղիազարյանը՝ հավելելով, որ այս ամբողջ «բռնեմ-բացթողեմ»-ի արդյունքում 16 մլն դոլար է մուտքագրվել, որոնք կոռուպցիայի ճանապարով գնացել էր բյուջեյից։
Նա ընդգծում է, որ այն, ինչ Նիկոլ Փաշինյանը խոստացել է, պետք է կատարի։
«Նախևառաջ պետք է սուտ չասել ժողովրդին։ Ինչ որ ասվել, խոստացվել է, պետք է կատարվի, եթե սխալ է եղել, պետք է տղամարդու պես դուրս գալ և ասել՝ ժողովուրդ ջան, կներեք, սխալվել ենք։ Սխալն ընդունելի կլինի, երբ որ դա ընդունվի, ոչ թե ամեն կերպ լղոզվի»,– ասաց նա։