Կարճ ժամանակ հետո հասկացանք՝ Փաշինյանի իշխանության կողմից հարգանք չկա մեր հանդեպ․ Հրանտ Մարգարյան
ՀՅԴ Բյուրոյի ներկայացուցիչ Հրանտ Մարգարյանի և ՀՅԴ-ի սպասումները՝ կապված նոր իշխանության հետ, չեն արդարացել։ Այդ մասին նա հայտարարեց այսօր՝ հունվարի 16-ին, տեղի ունեցած Դաշնակցության Ընդհանուր ժողովի ժամանակ։
Նա իր ելույթում նշեց, որ անցյալ տարվա գարնանը տեղի ունեցած իրադարձությունները ընդունել են որպես համաժողովրդական զարթոնք, որը կարող էր թոթափել երկրում երկար տարիներ ծանրացած անարդարությունները և ո՛չ ասել կաշառակերությանը, անգործությանն ու աղքատությանը։ Սակայն, Հրանտ Մարգարյանի խոսքով, ինչ-որ ուժեր լավագույնս օգտագործեցին ժողովրդի արդարացի դժգոհությունները և հետապնդեցին նպատակներ, որոնք ոչ մի առնչություն չունեին ժողովրդի դժգոհությունների, ցանկությունների ու պահանջների հետ։
«Ժողովրդական շարժումը գեղեցիկ էր ու հուժկու, արդարացի էր ու տարերային և անխուսափելի: Չնայած շարժման առաջնորդների հետապնդած նպատակներն ու ծրագրերը մեզ համար անորոշ էին, այդուամենայնիվ, ուզեցինք հավատալ, որ ժողովրդական նման մեծ ալիքը ընդունակ է զգաստության, պատասխանատվության այնպիսի մակարդակի բարձրացնել նրանց, որ կարողանան ձեռք բերած վստահության բացառիկ մանդատը լավագույնս օգտագործել իրապես ազգային, անկախ, ժողովրդավարական հզոր երկիր ունենալու համար:
Մենք համագործակցության ձեռք մեկնեցինք, բանակցությունների մեջ մտանք, Նիկոլ Փաշինյանի մակարդակով մեզ հավատացրին, որ հարգանքով են վերաբերում մեր կուսակցությանը, շատ լավ գիտակցում են, թե մենք ինչի համար և ինչ անելու համար ենք կոալիցիայի մաս կազմել։ Պայմանավորվեցիք հինգ հիմնական հարցերի շուրջ, թվում էր՝ ամեն ինչ դեպի լավն է գնում, սակայն շատ կարճ ժամանակ հետո հասկացանք՝ ոչ հարգանք կա, ոչ պայմանավորվածությունների նկատմամբ հավատարմություն, ոչ էլ այլ տեսակետ լսելու հանդուրժողականություն»,-ասաց Հրանտ Մարգարյանը։
Նա նշեց նաև, որ Դաշնակցության հեղինակությունը, թեև փորձեցին գցել, սակայն չհասկացան, որ ՀՅԴ-ն կա ու կմնա։