Միլիարդները հանգիստ չեն տալիս
Ազգային ժողովի այսօրվա նիստը թեժ վիճաբանությամբ մեկնարկեց, որի մասնակից կողմերն էին «Լուսավոր Հայաստան» և «Բարգավաճ Հայաստան» խմբակցությունները։
ԼՀԿ-ական, 1-ին․am կայքի գլխավոր խմբագիր Արման Բաբաջանյանն ԱԺ մշտական հանձնաժողովներից մեկի նախագահի թեկնածության քննարկման ժամանակ իր ելույթում խոսեց Հայաստանի վարած արտաքին քաղաքականության մասին՝ կանգ առնելով դեսպանների աշխատանքի վրա։
Բաբաջանյանի ելույթի կենտրոնում Ուկրաինայում ՀՀ նախկին դեսպան Անդրանիկ Մանուկյանի գործունեությունն էր։
Լրագրող պատգամավորը նախ հիշեցրեց, որ Անդրանիկ Մանուկյանը դեսպանատունն ու իր պաշտոնը ծառայեցրել է ռուսական շահին, համագործակցել է հայտնի քրեածին տարրերի հետ, նրա օրոք վատացել են հայ-ուկրաինական հարաբերությունները:
Անդրանիկ Մանուկյանի հասցեին ասվածը կուլ տալ չկարողացավ նրա խորհրդական եղած Արման Աբովյանը։ Նա շտապեց ԱԺ ամբիոնից հայտարարել, որ Արման Բաբաջանյանն առաջ է բրդում Ադրբեջանի կողմից առաջ քաշված դրույթները։
«Պարոն Բաբաջանյան, դուք երևի տեղյակ եք, որ ես 3 տարի եղել եմ Ուկրաինայում ՀՀ դեսպան Անդրանիկ Մանուկյանի խորհրդական։ Այդ թեզերը, որոնք Դուք հնչեցրել եք Ձեր ելույթում, հայկական ինֆորմացիոն դաշտ հիմնականում ներմուծվել են Ադրբեջանի կողմից։ Ի՞նչն է Ձեզ ստիպում այս ամբիոնից նեոադրբեջանական թեզեր առաջ բրդելը», - Արման Աբովյանը։
ԼՀԿ-ական և ԲՀԿ-ական պատգամավորները դահլիճում վեճի բռնվեցին, տեղից հրահանգ տվեցին Աբովյանին՝ ինչ խոսել, ինչից հետո էլ Արման Աբովյանը նիստը կիսատ թողեց և հեռացավ, իսկ ԱԺ միջանցքում էլ լրագրողներին ասաց, որ շոկի մեջ է։
Հարգելի՛ Արման Աբովյան, շոկի մատնվել պետք չէ․ չէ՞ որ Անդրանիկ Մանուկյանի խայտառակ պաշտոնավարման մասին ո՛չ առաջին, ո՛չ էլ վերջին անգամ է խոսվում։
Անդրանիկ Մանուկյանն այն մեծահարուստ պաշտոնյան է եղել, որ իր քաղաքական ամբողջ գործունեության ընթացքում չի խորշել զբաղվել բիզնեսով:
Ըստ մամուլի հրապարակումներից մեկի՝ Անդրանիկ Մանուկյանը 12 տարի զբաղվել է ՀՀ առաջին անհրաժեշտության պարենամթերքի, դեղորայքի մենաշնորհային ներկրմամբ, բացի այս, վերահսկել է «Սամանդ» մեքենաների ներմուծման մենաշնորհը, ինչպես նաև ԱՄԷ-ից, Եվրոպայից և ԱՄՆ-ից թանկարժեք մեքենաների ներկրումների մի հատվածը:
Անդրանիկ Մանուկյանը, դարձյալ ըստ մամուլի հրապարակումների, իր ձեռքում է կենտրոնացրել ռուսական փայտանյութի ներկրումը ՀՀ կահույքի արտադրության համար: Մանուկյանին են պատկանում նաև տարբեր բիզնես-պրոյեկտներ, այդ թվում՝ «Մետրոպոլ հյուրանոցը», ՀՀ բջջային կապի օպերատոր «Վիվասել ՄՏՍ»-ի գլխամասային գրասենյակի բազմահարկ նորակառույց շենքը, գործող գազալցակայաններ, շքեղ առանձնատներ, հսկայական հողատարածքներ և այլն։
Այս ու այլ բիզնեսների հաշվին է, որ Անդրանիկ Մանուկյանի կարողությունը գերազանցում է մի քանի միլիարդը։
Եվ տարիներ առաջ նման հրապարակումներ կարդալիս էր պետք շոկի մատնվել, ոչ թե այժմ՝ խորհրդարանում։
Նշենք,որ ԼՀԿ-ական պատգամավոր Արման Բաբաջանյանն այսօր լրագրողներին հիշեցրեց Անդրանիկ Մանուկյանի ևս մեկ բիզնես ճյուղի՝ հնդկահավերի բիզնեսի մասին։
Սա Անդրանիկ Մանուկյանի բիզնես գործունեության մասին, իսկ ինչ վերաբերում է ադրբեջանական թեզերն առաջ քաշելու Արման Աբովյանի պնդմանն, ապա այստեղ ամեն ինչ միանշանակ ընկալել պետք չէ՝ հաշվի առնելով Արման Բաբաջանյանին պատկանող խմբագրության պատին վեր խոյացած ԱՄՆ դրոշը, հիմա ինչ, կարելի է ենթադրել, որ նա էլ այդ պետության թեզերն է առաջ բրդում․․․