Ճանապարհներ չեք կարող փակել․ ինչ վտանգ է փորձում կանխել Փաշինյանը
Փողոց փակելով իշխանության եկած Նիկոլ Փաշինյանին, պարզվում է, այլևս ձեռնտու չեն փակված ճանապարհները։ Նա կոչ է անում բոլորին այլևս ճանապարհ չփակել։
Փաշինյանը բացարձակ կոմֆորտ վիճակում է՝ իրեն են պատկանում օրենսդիր և գործադիր իշխանություններն իրենց կարևորագույն պաշտոններով և հիմա, պարզապես, հավես չունի բողոքի ակցիաներ լսելու և ճանապարհների փակման հետևանքով առաջացած խնդիրները կարգավորելու համար։
Այժմ Փաշինյանն ասում է, որ ճանապարհ փակելու իրավունք չունեն նրանք՝ հասկացնելով, որ դրա բացառիկ մենաշնորհը պատկանում է իրեն։
«Դուք չե՛ք փակելու, որովհետև դուք դրա լիազորությունը չունեք, և ժողովրդից էլ չեք ստացել այդ լիազորությունը, որովհետև ժողովուրդն իր իշխանությանն ընտրել է և այդ իշխանության լիազորությունն է նաև ապահովել ճանապարհների անցանելիությունը: Եվ նրանք, ովքեր փակում են ճանապարհներ, առնվազն հետևողական, ես ուզում եմ հասկանալ, որ ինչ-որ հարցի վրա ուշադրություն են ուզում հրավիրել: Իսկ նրանք, ովքեր ուզում են կաթվածահար անել, նրանք գործում են ուղիղ կառավարության դեմ, որովհետև եթե իրենք իշխանություն են, ապա իշխանություն են նաև նրանք, ովքեր ուզում են ճանապարհով անցնել և չեն կարողանում այդ հնարավորությունից օգտվել»,- դիմելով Մանվել Գրիգորյանի կալանավորման պահանջով ճանապարհ փակած ցուցարարներին, իր սիրելի տարբերակով՝ ֆեյսբուքյան լայվով ասել է ՀՀ վարչապետը։
Պարզվում է՝ երբ ինքն էր ճանապարհ փակում, դա կառավարության դեմ ուղղված քայլ չէր, իսկ երբ դա անում են ՀՀ շարքային քաղաքացիները, դա արդեն դեմ է կառավարությանը․ ստացվում է՝ Փաշինյանն այլևս տարբերակ չունի երկրում օր օրի զարգացող կրքերը մեղմելու համար ու սկսել է խոսել շանտաժի լեզվով։
Կարելի է ենթադրել, որ Փաշինյանի այս արգելքն ու զգուշացումն ուղղված են նաև մարդասպան Մհեր Ենոքյանի ազատ արձակման դեմ բողոքի ակցիաներ անողներին։
Վստահաբար, Փաշինյանը Մանվել Գրիգորյանի դեմ ծավալված բողոքի ակցիաներն օգտագործեց որպես պատրվակ իր վարկանիշին թիվ մեկ հարվածը հասցնող հարցին՝ մարդասպանին ներում շնորհելու իր պատրաստակամությունը բոյկոտող հսկայական բազմության առաջն առնելու համար։
Արդյոք կլսի՞ իշխանություններից տարբեր հարցերով դժգոհող հասարակությունը նրա պահանջը և կենթարկվի՞ դրան, ցույց կտա ժամանակը, բայց մի բան ակնհայտ փաստ է․ Փաշինյանին իշխանության բերած նույն ժողովուրդն իրավունք ունի իր բողոքի ձայնը բարձրաձայնել և եթե Փաշինյանի համար ներվել են ճանապարհներ փակելն ու մարդկանց անհարմարություններ պատճառելը, ապա դրանք պետք է ներվեն նաև ամբողջ ժողովրդին։
Եթե խոսում եք ժողովրդավարության և հավասարության սկզբունքի մասին, ապա այն պարտավոր է չլինել ընտրովի կամ նախընտրելի, ինչպես երկրի արդարադատությունն է։