Որևէ շահարկում այս դեպքի շուրջ՝ անընդունելի է․ Արմեն Մուրադյանն Աղաջանովներին սատարում է իր ընտանիքի հետ միասին
«Ես այստեղ եմ, որ սատարեմ իմ վաղեմի բարեկամների՝ իմ ուսուցչի ընտանիքին և հարգեմ իմ վաղեմի ընկերոջ՝ Իոսիֆ Աղաջանովի հիշատակը»։
Կառավարության դիմաց կազմակերպված «Դեմ ենք մարդասպան Մհեր Ենոքյանի ներմանը» բողոքի ակցիայի ժամանակ լրագրողների հետ զրույցում իր տեսակետը հայտնեց Մխիթար Հերացու անվան պետական բժշկական համալսարանի (ԵՊԲՀ) ռեկտոր Արմեն Մուրադյանը։
Նա բողոքի ակցիային մասնակցում էր իր ընտանիքի հետ միասին։ Արմեն Մուրադյանը նշեց, որ միացել է ստորագրահավաքին որպես բժիշկ, որպես այդ ընտանիքի ընկեր, և որպես մարդ, ով դեմ է բռնություններին, երեխաների առևանգմանն ու դաժան սպանություններին։
Նա հերքեց մտահոգություններն այն մասին, թե համալսարանը բաժանվել է երկու մասի և հնարավոր է պառակտումներ լինեն, քանի որ ԵՊԲՀ, որտեղ որպես դասախոս աշխատում է մահացածի հայրը՝ Միքայել Աղաջանովը, աշխատում է նաև Մհեր Ենոքյանի եղբայրը՝ Հայկ Ենոքյանը։
«Ես բացառում եմ, որ պառակտումներ կլինեն։ Համալսարանն իր բարի համբավն ստեղծել է իր գործունեության շնորհիվ, իսկ այն, որ այստեղ այսօր համալսարանականներ կան՝ պետք է հասկանալ նրանց․ նրանք եկել են սատարելու իրենց դասախոսին։ Եվ ընդհանրապես, ուզում եմ մի բան ընդգծել․ որևիցե տեսակի վիրավորանք, որևիցե շահարկում այս դեպքի շուրջ՝ համարում եմ անընդունելի»,-եզրափակեց Արմեն Մուրադյանը։
Հիշեցնենք, որ դաժան սպանության համար ցմահ ազատազրկման դատապարտված Մհեր Ենոքյանին ներում շնորհելու դեմ տարբեր հիվանդանոցների բժիշկների նախաձեռնած ստորագրահավաքին միացել է մի քանի հարյուր մարդ։ Նրանց թվում է նաև Արմեն Մուրադյանը։