«Երևանի գլխավոր ճարտարապետ Արթուր Մեսչյանը ստում է». Մշակույթի նախարարությունից արձագանքում են
«Արամի 23-ի պատի փլուզումը խորհրդանշական էր, որովհետև բավական անկազմակերպ եւ անտրամաբանական քաշքշուքների հետեւանք էր»:
Այսպես է մեկնաբանել Երևանի գլխավոր ճարտարապետ Արթուր Մեսչյանը Արամի 23 հասցեում տեղի ունեցած փլուզումը։ Նա նկատել է նաև, որ երեք ամիս քննարկվել է Արամի 23-ի՝ հարակից շինհրապարակին հպվող պատը ամրացնելու հարցը, ներկայացվել են նախագծեր, որոնք Մշակույթի նախարարության կողմից չեն հաստատվել:
Երևանի գլխավոր ճարտարապետի այս հայտարարության արձագանքն իրեն երկար սպասել չի տվել։ Նախարարությունում համաձայն չեն Մեսչյանի կարծիքին և վստահեցնում են, որ հուշարձանին վնաս տվող անձը պարտավոր է պատասխան տալ և պատասխանատվություն կրել, իսկ թույլտվությունը տվել է քաղաքապետարանը։
Ավելին լրագրողների հետ զրույցում Մշակույթի նախարարության պատմության և մշակույթի հուշարձանների պահպանության գործակալության պետ Արմեն Աբրոյանը հայտատարեց․
«Երևանի գլխավոր ճարտարապետ Արթուր Մեսչյանը «ստում է», երբ ասում է, որ Մշակույթի նախարարությունը չի համաձայնեցրել քաղաքապետարանի առաջարկած նախագծերը»։
«Արթուր Մեսչյանն ասաց, որ Մշակույթի նախարարությունը չի համաձայնեցրել նախագծեր, դա պաշտոնապես ասում եմ՝ սուտ է։ Մշակույթի նախարարությանը դեռ ամիսներ առաջ ներկայացվել է մի նախագիծ, որն ուղարկվել է քաղաքաշինական կոմիտե և այնտեղ է մերժվել բոլոր կողմերի քննարկմամբ։ Դրանից հետո քաղաքաշինական կոմիտեն, քաղաքապետարանը հայտարարել են 2-րդ, 3-րդ, 4-րդ նախագծերի համար, պաշտոնապես հայտարարում եմ՝ չկան այդպիսի նախագծեր, որ ամրակայում արվի։ Ստիպված Մշակույթի նախարարությունը սեփականատիրոջ և «փոքրիկ երգիչների» հետ մեկ նախագիծ է քննարկել և Հեքեքյանի նախաձեռնությամբ էսքիզային նախագիծ է ներկայացրել, որին համաձայնություն է տրվել։ Այն ուղարկել ենք քաղաքապետարան և քաղաքաշինության կոմիտե։ Քաղաքապետարանն այս նախագծին ընթացք տալու փոխարեն, փոսը փորողին հարցնում է՝ կարելի՞ է ձեր տարածքում անենք և վնաս տվող անձը, ով պարտավոր է վնասը վերականգնել, ասում է՝ չէ, սեփականատերն էլ ասում է, որ իրենք նպատակահարմար չեն գտնում»,- ասաց նա։
Աբրոյանը նկատում է, որ տվյալ դեպքում խնդիրն այն է, որ կառուցապատման թույլատրությունը տվել է քաղաքապետարանը՝ առանց Մշակույթի նախարարության համաձայնության և քաղաքաշինական նորմերի խախտմամբ, որի արդյունքում վթարվել էր շենքի պատը։
«Նախարարությունն այդ մասին բազմաթիվ գրություններով տեղեկացրել է քաղաքապետարանին, քաղաքաշինության կոմիտեին։ Իսկ ամիսներ առաջ էլ նույնիսկ դիմել է դատախազությանը։ Հիմա էլ քննություն է ընթանում, որ քաղաքապետարանում թույլտվություն տվող անձանց այդ ամենի հետևանքների համար պատասխանատվության ենթարկվեն»,– ասաց Աբրոյանը։
Հիշեցնենք, որ «Հին Երևան» ծրագրի շրջանակներում, շվեյցարահայ Վարդան Սերմաքեշի կողմից կառուցվող ստորգետնյա ավտոկայանատեղիի և հասարակական սպասարկման տարածքի շինարարական աշխատանքները վնաս են հասցրել պատմամշակութային հուշարձան հանդիսացող շենքին: Շինարարության ընթացքում թուլացել է հողը, ինչի արդյունքում շենքի պատերին ճաքեր են հայտնվել: