Խնդիրը խորն է՝ Հայաստանում ոչ միայն ընդդիմադիր, այլև իշխող կուսակցություն չկա․ քաղաքագետ
Հայաստանում կուսակցական համակարգը կոլափսի մեջ է: Այսօր` հունվարի 11-ին, լրագրողների հետ զրույցում ասել է քաղաքագետ Ալեքսանդր Իսկանդարյանը:
Նրա գնահատմամբ` խորհրդարանական երկրում չկան զարգացած քաղաքական կուսակցություններ:
«Շատ հաճախ ասում են՝ հայկական խորհրդարանում կամ հայկական քաղաքական իրականության մեջ ընդդիմություն չկա: Բայց խնդիրն ավելի խորն է. Հայաստանում իշխող կուսակցություն նույնպես չկա: «Քաղաքացիական պայմանագիրը» դեռևս ուժեղ ձևավորված կուսակցություն չէ՝ ինտելեկտուալ, գաղափարական, մարդկային, ֆինանսական, մեդիառեսուրսներով»,- ասել է քաղաքագետը՝ հավելելով, որ Հայաստանում ընդդիմադիր կուսակցություններ նույնպես չունենք, և դա խնդիր է։
«Ես Ազգային ժողովում նույնպես ընդդիմություն չեմ տեսնում, հնարավոր է այն ձևավորվի խորհրդարանի աշխատանքի ընթացքում։ Մեզ բավական հետաքրքիր ու բարդ տարի է սպասվում, գուցե նաև՝ ոչ մեկ տարի, այլ ավելի»:
Ալեքսանդր Իսկանդարյանի խոսքով՝ իշխանության եկած մարդիկ դեռևս փետրվար-մարտին, թերևս, չգիտեին, որ իշխանություն են դառնալու, և հիմա, քանի որ պետք է երկիր կառավարեն՝ խնդիրներ են առաջանալու: