Արփինե Հովհաննիսյանը 2 օրից գործազուրկ կդառնա, բայց չի արտագաղթի
6-րդ գումարման Ազգային ժողովի փոխնախագահ Արփինե Հովհաննիսյանն աշխատելու է Դավիթ Հարությունյանի և իր մի շարք այլ ընկերների հետ հիմնած իրավաբանական ընկերությունում:
Այս մասին նա ասաց այսօր՝ հունվարի 11-ին, ԱԺ–ում լրագրողների հետ զրույցում։
«Տարիներ առաջ փաստաբանական գործունեությամբ զբաղվելու քննություն եմ հանձնել և լիցենզիա չեմ վերցրել, այս գործունեությամբ երևի զբաղվեմ՝ գումարած դրան հանրային քաղաքականության ձևաչափի մեջ մնալու համար որոշ պրոյեկտներ կան, բայց հիմա շատ փակագծեր չեմ կարող բացել: Կարող եմ ասել, որ հանրային քաղաքականությունից չեմ խուսափելու»,- նշեց նա:
Ինչ վերաբերում է նոր ձևավորված խորհրդարանին, ապա Արփինե Հովհաննիսյանը հուսով է, որ նոր պատգամավորները կգիտակցեն այն բեռն ու պատասխանատվությունը, որոնք իրենց վրա դրված են, կգիտակցեն այն կառույցը, որտեղ իրենք գտնվելու են և իրենց առաքելությանը համահունչ գործունեություն կիրականացնեն։
Արձագանքելով դիտարկմանը, թե շատ են երիտասարդները նոր խորհրդարանում՝ նա ասաց․ «Երբեք սրբազան սարսուռով չեմ վերաբերվել տարիքին կամ փորձառությանը, բայց առավել շատ կարևորում եմ պրոֆեսիոնալիզմն ու կոմպետենտությունը»:
Լրագրողները նկատեցին, որ նորընտիր պատգամավորների մի մասը վիրավորվում է, երբ իրենց համեմատում են ՀՀԿ–ական պատգամավորների հետ։
«Ոչինչ, կարող է որոշ ժամանակ անց մենք վիրավորվենք, երբ մեզ համեմատեք իրենց հետ»,-արձագանքեց Արփինե Հովհաննիսյանը։
Պատասխանելով հարցին, թե նախորդ 8 ամիսներին իր սոցիալական վիճակը բարելավվե՞լ է, թե՞ վատացել, նախկին պատգամավորը նկատեց. «Հաշվի առնելով, որ 2 օր անց գործազուրկ եմ դառնալու և այդ գործողությունների հետևանքով եմ դարձել գործազուրկ, հետևաբար դժվար է ասել, որ իմ սոցիալական վիճակը դրանից բարելավվել է»։
Ամեն դեպքում, Արփինե Հովհաննիսյանը չի արտագաղթի։ Համենայդեպս նա այդպես հայտարարեց։ «Ես չեմ պատրաստվում արտագաղթել, Հայաստանի Հանրապետությունն իմ հայրենիքն է, և ես շարունակելու եմ այստեղ գործունեություն ծավալել, որքան էլ որ պաթետիկ հնչի և որքան էլ որ հերոսական հնչի։ Կարծում եմ, որ գործունեության ոլորտները, որոնք ես ընտրել եմ ապագայի համար, թույլ տալու են, որ ՀՀ քաղաքացիների ձայնը լսելի դարձնեմ և նրանց շահերը պաշտպանեմ»,-ասաց նա։