Բժիշկներն ու լրագրողներն ասես կոլեգաներ լինեն․ Արա Բաբլոյան
«Լինենք օբյեկտիվ. Ինչպես որ բոլոր բնագավառներում ու բոլոր մասնագետների մեջ, լրագրողների մեջ էլ կան լավ ու վատ աշխատողներ»։
Այսօր՝ հունվարի 11-ին, 6-րդ գումարման ԱԺ-ի Ամանորի և սուրբծննդյան տոների առթիվ ընդունելության ժամանակ, պատասխանելով լրագրողների հարցին, ասաց ԱԺ նախագահ Արա Բաբլոյանը։ Վերջիններս հետաքրքրվեցին ԱԺ նախագահից՝ արդյոք համակարծի՞ք է Սերժ Սարգսյանի դիտարկմանը, թե լրագրողները գաղջ մթնոլորտ են տարածում։
Դեռ իր ելույթի ընթացքում, Արա Բաբլոյանը նկատեց, որ հաճախ մատնացույց անելով հրատապ լուծում պահանջող տարբեր խնդիրներ՝ լրագրողներն ասես դարձան իրենց օգնականներն ու խորհրդատուները: Նրա խոսքով՝ այդպիսին է լրագրողների կոչումը` ճիշտ ըմբռնել պետական ու հասարակական կյանքի բոլոր ոլորտներում առկա երևույթները։ Նա նկատեց նաև, որ մասնագիտության բերումով բժիշկներն ու լրագրողներն ասես կոլեգաներ լինեն։
Իր այս խոսքերն Արա Բաբլոյանը կրկնեց ու հաստատեց նաև լրագրողների հետ զրույցի ժամանակ։
«Լրագրողների մեջ էլ կան լավ և վատ աշխատողներ, ինչպես բժիշկների, ուսուցիչների ու մյուս մասնագետների։ Դրա համար էլ գտնում եմ, որ մենք ձեզ հետ միասին ինչ-որ տեղ կոլեգաներ ենք, և երբ որ մարդիկ ունեն հոգական խնդիրներ կամ հոգեբանական դժվարություններ, նրանք դիմում են բժիշկներին, որպեսզի ստանան համապատասխան օգնություն։ Լրագրողները կարող են հոգեկան և հոգեբանական հանգստություն առաջացնել կամ ընդհակառակը՝ ալեկոծություն բերել։ Ձեզ պատիվ չեն բերում նրանք, ովքեր արհեստական ալեկոծություն են առաջացնում, այնպես ինչպես մեզ պատիվ չեն բերում սխալ ախտորշմամբ բուժում նշականող բժիշկները։ Դրա համար եմ ասում, որ ինչ-որ տեղ մենք կոլեգաներ ենք»,-ասաց Բաբլոյանը։
Ինչ վերաբերում է նոր խորհրդարանին, ապա Արա Բաբլոյանը նկատեց, որ իրենք իրենց ձեռագիրը թողել են 6-րդ գումարման ԱԺ-ի աշխատանքներում․ «Շատ կարևոր է, որ դա ունենա իր շարունակությունը»: