Անկայուն, ոչ պետական գործիչ և անհաջող գործընկեր․ Մոսկվան Փաշինյանին չի վստահում. «Коммерсантъ»-ի անդրադարձը
ՀՀ վարչապետ Նիկոլ Փաշինյանի կողմից 2008 թվականի Մարտի 1-ի գործի բացահայտման հետաքննությունը հանգեցրեց Ռուսաստանի հետ լուրջ առճակատման։ Վերլուծելով Ռուսաստանի հարաբերությունները հարևան և գործընկեր պետությունների հետ՝ այդ մասին գրել է ռուսական «Коммерсантъ»-ը՝ անդրադառնալով նաև հայ-ռուսական առկա և հետագա հարաբերություններին։
Հոդվածի հեղինակը նշել է, որ խնդիր առաջացավ, երբ Մարտի 1-ի գործով մեղադրանք առաջադրվեց ՀՀ երկրորդ նախագահ, ՌԴ նախագահ Վլադիմիր Պուտինի մտերիմ ընկեր Ռոբերտ Քոչարյանին և ՀԱՊԿ քարտուղար Յուրի Խաչատուրովին։
Ու չնայած Հայաստանը զրկվեց ՀԱՊԿ քարտուղարի պաշտոնից, սակայն Փաշինյանը չփորձեց հետքայլ անել։ Բելառուսն առաջարկեց իր թեկնածուին և ստացավ ՀԱՊԿ անդամ բոլոր երկրների համաձայնությունը, բացի Հայաստանից։
Կադրային խնդիրը Փաշինյանին չհաջողվեց լուծել նույնիսկ դեկտեմբերի 27-ին Պուտին-Փաշինյան հանդիպման ժամանակ։
Ինչպես էլ որ 2019-ին հանգուցալուծվի ՀԱՊԿ քարտուղարի նշանակման հարցը, արդեն իսկ Մոսկվայում Փաշինյանի նկատմամբ ձևավորվել է անհաջող գործընկերոջ ուրվագիծ, որից ամեն ինչ կարելի է սպասել։
«Ոչ համակարգային, անկայուն և ոչ պետական գործիչն ամեն ինչ իրար է խառնել և միջպետական հարաբերությունները վերածել է շուկայական հարաբերությունների»,- «Коммерсантъ»-ի հետ զրույցում այսպես է բնութագրել Փաշինյանին հայ-ռուսական հարաբերությունների գծով պատասխանատու պաշտոնյաներից մեկը։
«Հայաստանի հետ ձևավորվող հարաբերությունները մտահոգում են, քանի որ ի տարբերություն Բելառուսի նախագահ Ալեքսանդր Լուկաշենկոյի և Ղրղզստանի նախագահ Նուրսուլթան Նազարբաևի՝ Փաշինյանն անկանխատեսելի է»,-ասել է լրատվամիջոցի զրուցակիցը։
Հեղինակը նկատում է նաև, որ հայ-ռուսական բարդ հարաբերությունների մասին փաստեց նաև Պուտինի ամանորյա շնորհավորանքը՝ ուղղված Փաշինյանի քաղաքական թշնամուն և հակառակորդին՝ Ռոբերտ Քոչարյանին։
Ռուսաստանի լիդերը կալանքի տակ գտնվող իր հայ ընկերոջը մաղթեց «քաջառողջություն, կայուն և ուժեղ կամք»։