Պուտին-Փաշինյան «խորքային» զրույցը Քոչարյանի՞ մասին էր․ Փաշինյանը վերադարձավ ձեռնունայն
Փաշինյան-Պուտին հանդիպման ժամանակ Ղարաբաղի հարցի կարգավորման վերաբերյալ որևէ քննարկում չի եղել։ Այդ մասին ասաց հենց ինքը՝ վարչապետի ժ/պ Նիկոլ Փաշինյանը՝ ֆեյսբուքյան լայվով։
Նա ասաց, որ ՀԱՊԿ-ի հետ կապված կոնկրետ որոշումներ չեն եղել, սակայն խոսել են այն մասին, որ ՀԱՊԿ կանոնադրության մեջ տեղի կունենան որոշ ուղղումներ։
Գազի գնի վերաբերյալ, Փաշինյանի խոսքով, ևս որոշում չկա, բայց նա, ինչպես ինքն է ասում, «լավատես» է։ Իհարկե, հիշում ենք, որ Փաշինյանը մինչև մեկնելը հայտարարեց, թե պայմանավորվել են գազի գնի շուրջ բանակցել հանդիպման ժամանակ։
Ու քանի որ երկրի վարչապետի ժ/պ-ն, ըստ էության, սպասումներով իրեն սպասող իր ժողովրդին ասելիք չուներ, քանի որ իր իսկ խոսքից ստացվում է, որ Պուտին-Փաշինյան արդեն հերթական հանդիպումն էական ոչինչ չի տվել, ուստի երկու երկրների ղեկավարների հանդիպման իմաստը նա խոսքով տարավ զգացմունքների հարթակ և նկարագրեց, թե ինչ բարիդրացիական մթնոլորտում է տեղի ունեցել հանդիպումը։
Փաշինյանը փորձում էր համոզել իր այն տեսակետը, թե հանդիպման բովանդակությունն անիմաստ չի եղել, և որ ՌԴ նախագահի հետ «հաջողվել է հասնել ընդհանուր ըմբռնման»․․․
Իհարկե, դատելով այն բանից, որ Ռուսաստանի նախագահ Վլադիմիր Պուտինը հենց այնպես Հայաստանից «տեղահան» չէր անի Նիկոլ Փաշինյանին ու իր մոտ կանչի, իհարկե այս առումով կարելի է ասել, որ «ընդհանուր ըմբռնման» դաշտ ձևավորվել է։ Հարցն այն է, թե կոնկրետ ի՞նչ հարցերի շուրջ են «իրար հասկացել» երկրների ղեկավարները։
Չի բացառվում, որ իսկապես Փաշինյան֊Պուտին զրույցը չափազանց խորքային է եղել։ Գազի գնի բանակցության անվան տակ Մոսկվա մեկնած Փաշինյանը ներքին կարգով «հրահանգավորվել է» թե՛ Պուտին֊Լուկաշենկո մինչև տարեվերջ հետաձգված խոսակցության վերաբերյալ, թե՛ ՀՀ երկրրդ նախագահ Ռոբերտ Քոչարյանի կալանավորման հետ կապված։
Ի դեպ, այս առումով ուշագրավ էր Փաշինյանի մեկնմանը զուգընթաց շրջանառված այն հայտարարությունը, թե իբր Պուտինը Փաշինյանին ասել է, որ Քոչարյանն իր ընկերն է, ու Փաշինյանն էլ իբր պատասխանել է, թե «զղջում եմ, որ նման ընկերներ ունեք»․․․
Նախ արդարության համար պետք է նշել, որ լուրերն սկսեցին շրջանառվել այն ժամանակահատվածում, երբ դեռ Փաշինյանը նույնիսկ տեղ չէր հասել։ Բացի այդ, նաև չկար պաշտոնական տեղեկատվություն այդ մասին ու պաշտոնական աղբյուր։
Ի վերջո, եթե նման խոսակցություն տեղի ունեցած լիներ այդ հանդիպման ժամանակ, ապա Փաշինյանը հաստատ առիթը բաց չէր թողնի, որ գազի գնի հետ կապված հուսախաբ ժողովրդի ականջը շոյեր իր սփոփիչ հայտարարությամբ, թե Քոչարյանի հարցում Մոսկվան չի միջամտում։
Իհարկե, չի բացառվում, որ Փաշինյան-Պուտին առանցքային թեման, կամ գոնե օրակարգային հարցերից առաջինը լիներ Քոչարյանի կալանավորման հարցը, իսկ ավելի կոնկրետ՝ Քոչարյանի ազատ արձակման հարցը։ Ամեն դեպքում, պետք է նկատել, որ Փաշինյանն իրականում նման ձևով չէր կարող արձագանքել ՌԴ նախագահին՝ ինչպես ներկայացվել է ֆեյք օգտատերերի կողմից։
Չենք նկարագրի հետևանքերը, թե ինչ տեղի կունենար, եթե իրականում Փաշինյանը նման բան ասեր, պարզապես փոքրիկ ակնարկ․ Փաշինյանի հետ ՀՀ-ի և Ղարաբաղի հարցում էական արդյունք չտված, բայց այնուամենայնիվ «խորքային» զրույցից հետո, Պուտինը չի հապաղում շնորհավորել իր ընկերոջ՝ Ռոբերտ Քոչարյանի գալիք Ամանորը։
Այս շնորհավորանքը թերևս նաև մեսիջ էր՝ բոլոր նրանց, ովքեր դեռ կասկածում են, որ Փաշինյանը Քոչարյանի հարցում կոշտ է խոսել Պուտինի հետ։
Արմինե Մկրտումյան
Հիշեցնենք, որ ՀՀ երկրորդ նախագահ Ռոբերտ Քոչարյանը դեկտեմբերի 7-ից գտնվում է կալանքի տակ։