Սյունիքում սեռական կյանքի մասին վարպետաց դասերի հետքերով․ դաս անցկացրած ՀԿ-ն չի հերքում (լուսանկարներ)
Դեկտեմբերի 17-ին հրապարակել էինք «Ովքե՞ր և ո՞ւմ թողտվությամբ են Սյունիքի դպրոցներում սեռական կյանքի «վարպետաց դասեր» տալիս» վերտառությամբ հոդված և հրապարակել այդ դասն անցկացնող ՀԿ-ի անունը՝ «Սոսե» կանանց հիմնահարցեր»։
Պահանջել էինք պարզաբանում սույն ՀԿ-ից այն մասին, թե քանի դպրոցականի են հասցրել մասնագիտացնել այս հարցում։
Խնդրել էինք նաև Կրթության և գիտության նախարարության արձագանքը՝ խնդրի վերաբերյալ։
Եվ ահա այսօր մեր խմբագրություն է զանգահարում ՀԿ-ի նախագահը և պահանջում հերքել մեր հրապարակումը՝ պահանջին կից մեզ էլեկտրոնային տարբերակով ուղարկելով, իր բնորոշմամբ, հերքման տեքստ՝ որոշ տեսանյութերի ու կայքերի հղումներով։
Ուշադիր կարդալով մեզ ուղարկած հերքման տեքստն ու կայքը, ևս մեկ անգամ հասկանում ենք, որ հրապարակել ենք իրականությանը համապատասխանող տեղեկություն․ հակառակը չէր էլ կարող լինել, քանի որ հրապարակել էինք իրենց երեխաների անաղարտությամբ մտահոգ ծնողների բողոքը։
Եվս մեկ անգամ բարձրաձայնել էինք գրանտակեր կառույցների և ազգային արժեհամակարգի՝ որևէ կերպ իրար հետ չհամընկնող և չխաչվող կողմերի մասին։
Իսկ հերքման տեքստին կից տեսանյութերն ուսումնասիրելիս՝ հասկանում ենք, որ «Սոսե» կանանց հիմնահարցեր» ՀԿ-ն ոչ թե հերքում, այլ հաստատում է մեր հրապարակումը։ Իսկ թե ինչու է այս ՀԿ-ն նման դասընթաց անցկացրել հենց Սյունիքի մարզում՝ սոցիալապես բազմաթիվ խնդիրներ ունեցող Ագարակում, թողնում ենք մեր ընթերցողների դատին և հավելում՝ եթե ձեր գրանտներն ուղղեիք որևէ աղքատ համայնքի զարգացման համար, մեր թիրախում միանշանակ չէիք հայտնվի։
Ինչևէ, լինելով անաչառ լրատվամիջոց հրապարակում ենք նաև մեզ ուղարկված հերքման կամ իրազեկման տեքստը և սույն ՀԿ-ին զգուշացնում՝ լրատվամիջոցին պիտակավորումներ տալիս լինել առավել զգույշ՝ դատարանում չհայտնվելու և այս թեման այնտեղ չվիճարկելու համար։