Ձայն բարբառոյ՝ յանապատի
Ռուսաստանի Դաշնության արտգործնախարար Սերգեյ Լավրովը «Կոմսոմոլսկայա պրավդա»-ին տված հարցազրույցում պատմել է Հայաստանում օտարերկրյա զինվորականների բացակայությունը երաշխավորող փաստաթղթի մասին: Նա հայտարարել է, որ ներկայում Մոսկվան ու Երևանը նախապատրաստում են փաստաթուղթ, որը պետք է երաշխավորի Հայաստանում օտարերկրյա զինծառայողների բացակայությունը:
«Հայաստանի հետ ավարտին ենք հասցնում այն փաստաթղթի նախապատրաստումը, որը կերաշխավորի այնտեղ օտարերկրյա զինծառայողների բացակայությունը, և այն, որ այնտեղ կատարվող ամեն բան որևէ ռիսկի ու սպառնալիքի տեսանկյունից թափանցիկ կլինի»,- հայտարարել է արտգործնախարարը:
Լավրովի այս հայտարարությունից ժամեր անց էլ հայկական կողմից պաշտոնական մակարդակով որևէ պարզաբանում չտրվեց:
Փաստորեն, Լավրովը հայտարարում է մեր անվտանգության երաշխիքը սահմանափակող փաստաթղթի ապագա ստորագրման մասին, հայտնում, որ «ռուսի սապոկից» բացի, այլ երկրի զինվորականի «սապոկ» չի հայտնվի այդ լաբորատորիաներում, որոնք, ի դեպ՝ ստեղծվել են նաև ամերիկյան աջակցությամբ, և հայկական կողմում սուս քնած են:
Մեր իշխանավորները զբաղված են ֆեյսբուքյան լայվերով և ներքաղաքական գզվռտոցով, որը չդադարեց անգամ Ազգային ժողովի արտահերթ ընտրություններից հետո:
Այս համատեքստում՝ խիստ տարօրինակ է երկրի Արտաքին գործերի նախարարության լռությունը. տպավորություն է, որ մենք նման նախարարություն ընդհանրապես չունենք:
Ողջ մեդիան գրում և վերլուծում է Լավրովի հայտարարությունը, որով Հայաստանում բացառվելու է, փաստորեն, օտարերկրյա ռազմական ամենաչնչին ներկայությունն անգամ:
Սա այն հարցն է, որը պետք է դրվի հանրային քննարկման և լայն կոնսոլիդացիայով էլ լուծում ստանա: Սակայն, ինչպե՞ս քննարկես մի բան, որի մասին երկրիդ համապատասխան կառույցները լռում են, իսկ որ ամենավատն է՝ գուցե ասելիք չունեն: