Ջրի երես են դուրս գալիս սկանդալային մանրամասներ
«Մարտի 1-ի» քննչական խմբի նախկին ղեկավար Վահագն Հարությունյանն այսօր սկանդալային հարցազրույց է տվել կայքերից մեկին՝ բացելով փակագծեր Մարտի 1-ի գործով ընթացող քննության վերաբերյալ:
Մասնավորապես, Հարությունյանը նշել է, որ Մարտի 1-ի գործը վերաբացելուց հետո ինքը երբևէ չի հարցաքննվել. «Այդ գործով առաջին ծանուցումը ստացել եմ, կարծեմ՝ սեպտեմբերի 11-ին. այն մեր հասցեով տուն էին ուղարկել, և իմ փաստաբանը արձագանքել է ծանուցմանը, գրավոր բացատրություն է ներկայացրել քննիչին, որ ես գտնվում եմ Մոսկվայում` բուժման նպատակով, և որ անհրաժեշտության դեպքում նրանց կտրամադրվեն կոնտակտային տվյալներ, հասցե և ինչ որ անհրաժեշտ է։ Սակայն որևէ արձագանք երկար ժամանակ չկար»,-նշել է Հարությունյանը՝ շեշտելով, որ հետախուզում հայտարարելու համար ՀՔԾ-ն ուղղակի կեղծիքների է գնացել:
Այնուհետև, Հարությունյանն անդրադարձել է իրեն որպես վկա հարցաքննելու հրավերին և շեշտել, որ վկան չունի պարտավորություն արտերկրից ժամանելու հարցաքննության։
«Ես ինքս եմ զանգահարել քննիչներին, հայտնել իմ հասցեն, կոնտակտային տվյալները և կրկին ասել, որ 1-2 օրվա ընթացքում ես կարող եմ տեղեկատվություն տալ իմ՝ Հայաստան վերադառնալու ճշգրիտ ժամանակի վերաբերյալ»,-նշել է Հարությունյանը՝ ընդգծելով, որ իրենից ՀՔԾ-ն թաքցրել է այն, որ իրեն հրավիրում է ոչ թե որպես վկա, այլ որպես մեղադրյալ:
«Եթե ինձ ասեին, որ ինձ որպես մեղադրյալ են ներգրավել, ես բուժումը կթողնեի, որ հետախուզումը բացառվեր, և հաստատ կվերադառնայի Երևան, որովհետև հաստատ ոչինչ չունեմ թաքցնելու,-ասել է նա և շարունակել,- այսօր Հայաստանի Հանրապետությունում արդարադատությունը ոտնատակ է տրված, հավասարեցված է զրոյի, և արդարադատություն՝ որպես այդպիսին, գոյություն չունի»։
Ըստ Հարությունյանի՝ վարչապետի ընտրության ժամանակ Նիկոլ Փաշինյանը հայտարարեց, թե Մարտի 1-ի գործով լինելու են աղմկոտ բացահայտումներ. «Նա որտեղի՞ց գիտեր մանրամասները, եթե քրեական գործի նյութերին ծանոթ չէր ու չէր ուղղորդում։ Նույնի մասին են վկայում նաև պարոն Սասուն Խաչատրյանի հայտարարությունները։ Ես դեռևս ոչ ոքի չեմ մեղադրում, ես ասում եմ իմ կարծիքը: Նրանք, ովքեր ասում են, որ ես փորձագետին եմ ուղղորդել, ես էլ ասում եմ ՝ գլուխներդ պատին եք տվել։ Այս ամենից հետո քննչական թիմի ղեկավարը տեղեկացնում է, որ ինքը ոչ մի հարաբերություն Փաշինյանի հետ չի ունեցել: Ես ոչ միայն նրան, այլև բազմաթիվ անձանց գիտեմ, ովքեր քրեական գործի նախաքննությամբ ներգրավված են եղել որպես մեղադրյալներ, իսկ ներկայում ստանձնել են պետական բարձր պաշտոններ»,-ասաց Հարությունյանը։
Վահագն Հարությունյանը, փաստորեն, ոչ թե ակնարկեց, այլ բաց տեքստով ասաց՝ Նիկոլ Փաշինյանն անձնական վրեժ է լուծում, իսկ «շինովի» արդարադատությամբ նման հանցագործություն բացահայտել պարզապես հնարավոր չէ:
NEWSPRESS.am