Աննայի ժեստը՝ Սամվել Ալեքսանյանին, օդում կախված լուրերն ու «գաստրոլները»՝ Շվեյցարիայում
Վարչապետի տիկնոջ հաստիքը զբաղեցնող և կառավարական «գաստրոլներից» ճոխ- ճոխ օգտվող Աննա Հակոբյանը մեկնում է Շվեյցարիա: Ի դեպ, մեկնումը ներկայացվում է որպես աշխատանքային այց: Աշխատանքը, հավանաբար, վարչապետի կինը լինելն է, թե չէ՝ «Իմ քայլը» և «City of smile» հիմնադրամների հոգաբարձուների խորհրդի նախագահի աշխատանքային այցը ո՞րն է:
Կամ ի՞նչ կապ ունի, օրինակ, «City of smile» հիմնադրամի հոգաբարձուների խորհրդի նախագահը, ով մարդկանց կոչ է անում աղցան ուտել «Ոսկեվազ» ռեստորանում, որ աշխատանքային այցով լինի Հայոց ցեղասպանության հիշատակին նվիրված՝ «Հիշողության լապտերներ» հուշահամալիրում: Գոնե որպես սովորական այցելու գնար, կհասկանայինք, ոչ թե անունը դնեին՝ «աշխատանքային այց»:
Կամ, ասենք, ի՞նչ գործ ունի «Իմ Քայլը» հիմնադրամի հագոբարձուների խորհրդի նախագահն աշխատանքային այցով «Ֆրանկ Մյուլլեր» գործարանում: Ի դեպ, այս ընկերության նախագահը՝ Վարդան Սրմաքեշը, Հայաստանում բոլոր իշխանությունների համար միշտ եղել է իբրև պոտենցիալ ներդրող, նա ներկայացվում է՝ որպես Հայաստանի տնտեսությունն աշխուժացնող առանցքային ներկայացուցիչ, նրա հետ հանդիպումները Հայաստանում կազմակերպվում են նախագահի ու վարչապետի մակարդակով, անհատույց օգտագործելու նպատակով շենք ու շինություններ են տրամադրվում, իսկ հենց հերթը հասնում է ներդրումներին, մարդկանց աչքերն այդպես էլ ջուր են կտրում: Ինչպես եղել է Գյումրիում, որտեղ իբրև պետք է մեկ միլիոն դոլարի ներդրում կատարվեր, բայց սայլը դեռևս տեղից չի շարժվում:
Ինչևէ, Աննա Հակոբյանը վարչապետի պաշտոնակատարի տիկնոջ հաստիքի ընձեռած հնարավորություններով աշխատանքային այցով կլինի Շվեյցարիայի՝ հենց այդ գործարանում: Թե ինչ կտա մեզ նրա այդ այցը, գուցե իմանանք նրա վերադարձից հետո:
Աննան նաև կհանդիպի Ժնևի հայ համայնքի ներկայացուցիչների հետ, իսկ թե ինչ կտա սա մեզ, դա էլ հաջորդ դասին:
Աննայի ակտիվությունը բավականին նկատելի է. վերջերս նա հանդիպեց հայ դիզայներների հետ, ցանկանում են՝ հայ դիզայներների աշխատանքներն այնպես ներկայացնել, որ ժողովուրդը սկսի սպառել: Ժողովուրդն, իհարկե, լավ գիտի հայ դիզայներների հագուստների գները, որոնք էժանագին կտորների հիմքով, մեկ-երկու զարդանաշխով, բայց անհասանելի գնով վաճառքի են հանված, բայց այդպես էլ մնում են խանութների ստենդներում: Գիտե՞ք՝ ինչու, տիկի′ն Աննա, որովհետև դրանք շատ թանկ են, իսկ ձեր ամուսինը աշխատավարձ չի բարձրացնում:
Աննա Հակոբյանը վերջերս կրել էր նաև «Ալեքս տեքստիլի» արտադրության հագուստ: Ի դեպ, հայտնի է, որ տեքստիլը պատկանում է Սամվել Ալեքսանյանին: Դե Աննան էլ աջակցություն է հայտնում տեքստիլի հագուստի տարածմամբ, հավանաբար, այդ կերպ շնորհակալություն է հայտնում Սամվել Ալեքսանյանին: Չէ՞ որ օդում կախված լուրերի համաձայն, Աննայի եղբորը՝ Հրաչ Հակոբյանին, պատգամավոր դարձնելու սուրբ գործին իր անմիջական ազդեցությունն է ունեցել Սամվել Ալեքսանյանը:
Ի դեպ, այդ վարչական շրջանում, Սամվել Ալեքսանյանը միայն Հրաչ Հակոբյանին չի աջակցել, նա նաև հոգացել է առաջին փոխվարչապետի ձայների մասին, ով ոչ մի վայրկյան չմասնակցեց քարոզարշավին: Ժողովրդական լեզվով ասած՝ «արխային էր, Սամոն սաղ հարցերը կլուծի»: