Խաբեություն և «գցոցի»՝ հայաստանյան online shopping-ի ոլորտում
Հայաստանում ինտերնետ գնումներ կատարելը բավականին ռիսկային գործ է: Եթե ամբողջ աշխարհում online shopping-ը բավականին վստահելի և հարմարավետ գործիք է, ապա մեր երկրում այն «գցելու» և գերշահույթ ստանալու միջոց է:
NEWSPRESS.am-ին դիմած քաղաքացիներից մեկը պատմեց, թե ինչպես է բավականին հայտնի և թանկարժեք ծաղկի սրահներից մեկից՝ flora.am-ից, ցանկացել հարազատի թաղմանը ծաղկեպսակ ուղարկել և բախվել ցավալի իրականությանը:
Մինչ պատվիրելը ծաղկի սրահի աշխատակիցը Իսպանիայում գտնվող քաղաքացուն հավաստել է, թե անպայման նկարում պատվերված դիզայնին և որակին համապասխան ծաղիկներ կառաքեն, սակայն վերջում առաքել են արմատապես տարբեր ծաղկեպսակ:
Ծառայությունից դժգոհ քաղաքացին նաև պնդում է, որ իր պատվիրած ծաղկեպսակի արժեքը 100 $-ի սահմանում է, իսկ առաքվածը՝ 60$-ի:
Իրեն խաբված համարող քաղաքացին զանգահարել է ծաղկի սրահ, սակայն այնտեղից նրան պատասխանել են չոր ու կոպիտ և նշել. «Ի՞նչ կարող ես, ինչ էլ անես, Եվրոպայից Հայաստան մեզ դատի տվեք»:
Մենք կապ հաստատեցինք նաև սրահի տնօրենի հետ, ով մեզ հետ զրույցում ասաց, թե փորձում են ամեն կերպ քաղաքացուն իրենց աշխատանքով գոհացնել, բայց կոնրետ այս դեպքում դժվար թե իրենց մոտ դա ստացվի:
Նշենք, որ մինչ տնօրենի հետ կապ հաստատելը աշխատակիցը մեզ ասաց, որ քննարկվում է գումարի 30%-ի վերադարձի հարցը, սակայն տնօրենն այս մասին դեռ որոշում չուներ:
Ի՞նչ է ստացվում՝ մարդը կարող է պատվիրել մի բան, առաքեն բոլորովին այլ բան, իսկ, երբ հարցնում ես՝ ինչո՞ւ, տնօրենն ասում է, որ դա խիստ սուբյեկտիվ դիտարկում է:
Քաղաքացին մեզ է տրամադրել նաև լուսանկարներ, թե ինքն ինչ է ցանկացել առաքել և ինչ է իրականում առաքվել: Դատեք ինքներդ: