Մեր զինվորը դուխով է, քաջ է, բայց առաջնագծում պետք է լինեն պայմանագրային փորձառու զինծառայողներ. Ծառուկյան
Այսօր բոլորն էլ ուզում են լավ ապրել, ու հնարավոր է այնպես անել, որ օգնենք ժողովրդին լավ ապրել:
Այս մասին հայտարարեց «Բարգավաճ Հայաստան» կուսակցության նախագահ Գագիկ Ծառուկյանը՝ նախընտրական քարոզարշավի շրջանակում երևանցիների հետ հանդիպման ժամանակ:
Հանդիպումը կազմակերպվել էր Կարեն Դեմիրճյանի անվան մարզահամերգային համալիրում՝ հաշվի առնելով եղանակային անբարենպաստ պայմանները: Գագիկ Ծառուկյանն իր ելույթի ժամանակ մեկ առ մեկ անդրադարձավ այն բոլոր ոլորտներին, որտեղ կուսակցությունը պատրաստ է դրական փոփոխություններ իրականացնել: Այս առումով, թերևս, ոչ մի բաց ոլորտ չմնաց. խոսվեց թե՛ առողջապահական, թե՛ կրթական, թե' հարկային, թե՛ օրենսդրական, թե՛ ներդրումային ու այլ խնդիրների մասին:
Նա նաև նկատեց, որ առաջնագիծ չպետք է ուղարկել 18 տարեկան տղաների. առաջնագծում պետք է լինեն փորձված, պայմանագրային ծառայողներ:
«Ապրիլյանը ցույց տվեց, որ մեր տղերքը դուխով են, քաջ են, ես նրանց ցավը տանեմ, Աստված պահապան մեր զինվորներին, բայց միայն խոսքերով չէ. ամեն մեկս պետք է մեր քայլն անենք: Հերոս որդի ունենալը հպարտություն է, նրանց կորստի վիշտը չի անցնի: Բայց պայմանագրային ծառայողների ֆինանսավորման և առաջնագիծ տանելու մասին պետք է մտածել»,-ասաց Գագիկ Ծառուկյանը: