Սիփան Փաշինյանի և Հրաչ Հակոբյանի միակ ելքը
Այս քարոզարշավից ամենամեծ օգուտը երևի թե ստանում են տպագրական ծառայություններ մատուցող ընկերությունները։ Փաստն այն է, որ հազարից ավել թեկնածուներ հազարավոր բուկլետներ և աֆիշներ են տպագրել և ամրացնում են այնտեղ, որտեղ իրենց սիրտն է ուզում։
Շրջանցելով հարցը, թե որտեղից այսքան մեծ ֆինանսավորում՝ հատկապես իշխանական ուժին, պետք է նշել, որ նրանք տարրական հարգանք չեն ցուցաբերում մեր քաղաքների հանդեպ։
Ողջ Երևանը լցված է ինչ-որ «թրաշավոր հրաշամանուկների» լուսանկարներով ու «էստի համեցեքներով»: Նույնը պետք է ասել նաև մեր մյուս համայնքների մասին։
«Իմ քայլը» դաշինքի համապետական ցուցակը դիտարկելիս ակնհայտ է դառնում, որ կոնկրետ նպատակով՝ վարչապետ Նիկոլ Փաշինյանի եղբորորդուն՝ Սիփան Փաշինյանին և վարչապետի տիկնոջ՝ Աննա Հակոբյանի եղբորը՝ Հրաչ Հակոբյանին ցուցակում հատկացրել են վերջին տեղերը։ Նրանք 182 հոգանոց ցուցակից զբաղեցնում են 180-րդ և 181-րդ հորիզոնականները։ Մի առթիվ Հրաչ Հակոբյանն ասաց, որ այս մոտեցման հիմնական պատճառը հանրության կարծիքն է, որ չասվի՝ Նիկոլն իրենց առաջ է բրդում։ Այս թեկնածուների՝ խորհրդարան անցնելու միակ շանսը ռեյտինգային ընտրակարգն է, բայց քանի որ այս մարդիկ փառահեղ անցած ուղու տերեր չեն, անգամ շենքի բակի շունը կհաչի վրաները, հետևաբար, ռեյտինգայինով անցկացնելու համար հարկավոր է փող ծախսել։ Նրանք այդպես էլ անում են։
Թիվ 3 ընտրատարածքում (Մալաթիա-Սեբաստիա, Շենգավիթ) առաջադրված Հակոբյանը, ում պատկերը զարդարում էին «Նոյ» տաքսի ծառայության մեքենաները, պնդում է, թե նախաձեռնությունն առանց իր իմացության է արվել, հետո հեռացվել է։ Նշենք, որ ժամանակին խոսք էր գնում այն մասին, որ «Նոյ» տաքսին պատկանում է Աննա Հակոբյանի հովանավորյալին, ում էլ փորձում էր Աննան թաղապետ կարգել։ Ինչևէ, ընդունենք՝ այդ պաստառներն այսօր չկան, բայց կան և դեռ շարունակում են փակցնել չնախատեսված այլ վայրերում։
Օրինակ, Սիփան Փաշինյանի պաստառները (առաջադրվել է թիվ 13 ընտրատարածքում), որ շենքերից մեկի պատն էին կեղտոտում, բնակիչների նախաձեռնությամբ պոկվել էին, մաքրվել, սակայն քիչ անց դրանք նորից փակցվել էին, որովհետև, ինչպես կասեր Սիփանը՝ «Մենք ունենք մեծ քանակությամբ պոստերներ»։
Նորից չանդրադառնալով հարցին, թե որտեղից նրանց այդքան գումար, պետք է նկատենք, որ հեղափոխական ուժերը չեն սիրում երկիրը, նրանք պատրաստ են տրորել յուրաքանչյուր սրբություն, միայն թե՝ հասնեն իրենց նպատակին՝ փափուկ աթոռին։