Վստահ ենք՝ Դուք տեղեկացված չեք այն հանգամանքի մասին, որ Ձեր հանձնարարությունն անտեսվել է. բաց նամակ՝ Փաշինյանին
ՀՀ Զինված ուժերի պահեստազորի սպաները բաց նամակով դիմել են վարչապետի ժամանակավոր պաշտոնակատար Նիկոլ Փաշինյանին։ Նամակում, մասնավորապես, ասված է.
«Հարգելի պարոն Փաշինյան
Չէինք ցանկանա կրկին դիմել Ձեզ և մեր խնդրով շեղել Ձեզ այն կարևորագույն առաքելությունից, որին Դուք լծվել եք հանուն Հայաստանի բարգավաճման և ժողովրդի բարեկեցության:
Եթե հիշում եք, սույն թվականի սեպտեմբերի 18-ին Դուք հանդիպեցիք մեզ հետ, լսեցիք մեր խնդիրները և Ձեր աշխատակազմի պաշտոնատար անձանց հանձնարարություն տվեցիք, որ մեկամսյա ժամկետում ստեղծվի միջգերատեսչական հանձնաժողով, որը կաշխատի գտնել պահեստազոր անցած և բնակարանային հաշվառման մեջ գտնվող սպաներին բնակարաններով ապահովելու հարցի լուծումներ ու որի կազմում կընդգրկվեր նաև մեր ներկայացուցիչը:
Սակայն, մեր նախաձեռնության անդամների հետ հանդիպման ժամանակ, ՀՀ պաշտպանության նախարարի տեղակալ պարոն Գ. Բալայանը հայտարարեց, որ ինքը գտել է ոչ նպատակահարմար մեր ներկայացուցչի ներկայությունը նշված հանձնաժողովի աշխատանքներին: Մենք` զինվորականներս, սովոր ենք կարգապահության և կատարողականության ու մեր համար շատ զարմանալի էր նման մոտեցումը։
Նման գործելաոճը զայրույթ է առաջացրել մեր նախաձեռնության անդամների շրջանում և խաթարել այն վստահությունը մեր հարցի արդարացի լուծման նկատմամբ, որը մեր հանդիպման ժամանակ Դուք մեզ ներշնչեցիք:
Մենք վստահ ենք, որ Ձեզ չեն զեկուցում գործի ամբողջ ընթացքը և Դուք տեղեկացված չեք այն հանգամանքի մասին, որ Ձեր հանձնարարությունը, մեղմ ասած, անտեսվել է:
Կրկին անգամ խնդրում ենք Ձեր հանձնարարությունը համապատասխան պաշտոնատար անձանց` մեր նախաձեռնության անդամին միջգերատեսչական հանձնաժողովի աշխատանքներում ընդգրկելու համար:
Մենք կատարել ենք մեր պարտքը Հայրենիքի նկատմամբ` կրելով զրկանքներ: Մեր հետ հավասար զրկանքներ են կրել նաև մեր ընտանիքների անդամները: Ակնկալում ենք, որ պետությունը նույնպես վերջապես կկատարի իր ստանձնած պարտավորությունները:
Հարգանքով` ՀՀ ԶՈՒ պահեստազորի սպաներ»։