Բանակի թուլացումը կատարվում է վարչապետի ուղղակի հրահանգով. Շահնազարյան
ՀՀԿ համամասնական ցուցակով առաջադրված Դավիթ Շահնազարյանը նկատում է, որ նոր իշխանությունը բանակի նկատմամբ առաջին օրվանից հարձակումներ է իրականացնում, իսկ հիմա բանակը դարձրել է իր թիրախ:
«Երբ առաջին գծից մարտական գեներալներին ու սպաներին ծանուցագրերով կանչում ենք ՀՔԾ և մաքսիմում կապիտանի հավասար աստիճան ունեցողները նրան ժամերով սպասեցնում են, դա ուղղակի ուղղված է բանակի դեմ: Ավելին՝ նրա նպատակն է բանակը բերել այն վիճակի, ինչ վիճակում ոստիկանությունն է գտնվում»,- ասաց Շահնազարյանը՝ ընդգծելով, որ բանակի հետ պետք է հասկանալ՝ ինչ ես անում, իսկ «դասալիքների» կառավարությունը դա չի կարող հասկանալ։
«Իշխանության կողմից հայտարարություններ են եղել, որ ԱԱԾ-ի կողմից հրամանատարներ են կալանավորվել: Բանակում տիրող իրավիճակի մասին, սովորաբար, ԱԱԾ-ն ուղարկում է գրություն բանակի ղեկավարությանը, և բանակն ունի ռազմական ոստիկանություն, կա դատախազություն, դրանք են իրականացնում: Երբ ես Ազգային անվտանգությունն էի ղեկավարում, նման դեպքեր շատ-շատ են եղել, ես այդ մասին տեղյակ եմ պահել պաշտոնապես այն ժամանակ պաշտպանության նախարարին` Սերժ Սարգսյանին»,- ասաց նա և նշեց, որ գործող անվտանգության սպաներ են հանդիպել և կիսվել մտահոգությամբ։
Արձագանքելով դիտարկմանը, թե Փաշինյանը նշում է, ո ՀՀԿ-ում պետք է «ծպտուն» չհանեն բանակի մասին, քանի որ այսքան տարի թալանել են, այնինչ ՀՀԿ ցուցակը գլխավորում է պաշտպանության նախկին նախարարը, Դավիթ Շահնազարյանն ասաց․ «Բանակի թուլացումը կատարվում է վարչապետի ուղղակի հրահանգով»։